Shtatori pritet të jetë një muaj i ‘nxehtë’ politik.
Këtë vit, vapa nuk ikën me gushtin. Shtatori i ri politik nuk do të jetë i nxehtë vetëm nga polarizimi, por edhe nga temperaturat e larta.
Kundërshtia e parë nis që me çeljen e sesionit të ri parlamentar. Çelja e sesionit parlamentar nuk do të jetë më 7 shtator, por të martën, më 8 shtator.
Edhe pse Kushtetuta, në nenin 74 të saj, përcakton se sesioni i ri nis të hënën e parë të shtatorit, Kuvendi ka vendosur ta kapërcejë këtë datë.
Sipas kalendarit të festave zyrtare, e hëna është ditë pushimi, pasi Dita e Shenjtërimit të Nënë Terezës këtë herë është të shtunën.
Data e çeljes është elementi i parë ku politika mendon ndryshe. Në një reagim për “A2”, kreu i grupit parlamentar të PD-së, Gazment Bardhi, thotë se Kushtetuta është mbi ligjin.
“Nuk mendoj që deputetët kanë nevojë për më shumë ditë pushimi. Kushtetuta është mbi ligjin për festat zyrtare dhe, si e tillë, duhet të respektohet Kushtetuta.”
Por shtatori sjell në Parlament edhe reformën territoriale, propozimin e njëanshëm të PS-së. Të djathtët e kanë kundërshtuar, por tashmë ky debat, krahas selive të partive, do të zhvendoset në Komisionin e Ligjeve dhe në foltoren e Parlamentit.
Ndarja e territorit me 46 bashki, nga 61 që janë aktualisht, sipas të majtëve, duhet të miratohet në fillim të tetorit.
Ndërsa reforma territoriale i ndau palët, reforma zgjedhore mbetet ende një ishull bashkëpunimi mes PS-së dhe PD-së. Sipas objektivit, deri në fund të vitit duhet të miratohet ligji për financimin e partive politike, ndryshimet në Kodin Zgjedhor, përfshirë edhe financimin e fushatës, si dhe ndalimet për përdorimin e burimeve shtetërore gjatë zgjedhjeve.
Një tjetër detyrë ku palët bëhen bashkë në heshtje është edhe miratimi i ligjeve për t’i përafruar ato me legjislacionin e BE-së.
Në këtë sezon politik do të ketë një rol edhe Presidenti i Republikës, pasi i duhet të shpallë datën e zgjedhjeve lokale të vitit 2027. Sipas Kodit Zgjedhor, ato duhet të zhvillohen në dy të dielat e fundit të prillit, më 18 ose 25 prill, ose në të dielat e para të muajit pasardhës, më 2 ose 9 maj.
Por, para se të shkojnë te zgjedhjet apo në seancën e parë të Parlamentit, socialistët do të duhet të kalojnë ethet e planeve të kryeministrit Rama për ndryshime të mundshme në parti dhe në qeveri.
