Shtabi Elektoral i kandidatit të koalicionit “Aleanca për Shqipërinë Europiane” Muharrem Rama ka denoncuar presionin që sipas saj po ushtrohet nga ish-Ministri i Brendshëm Flamur Noka ndaj nëpunësve të njësisë administrative të Maqellarës.
Sipas Shtabit Elektoral të Ramës, deputeti i Partisë Demokratike ka intensifikuar veprimet e tij në përpjekje të hapur për të ndikuar në tjetërsimin e vullnetit të lirë të banorëve të njësisë së dytë administrative më të madhe në Bashkinë Dibër.
“Gjatë tre ditëve të fundit, nga ana e zotit Noka është faktuar të jenë kryer telefonata kërcënuese dhe fyese ndaj: Gj.T. drejtoreshë e gjimnazit Maqellarë; G.Q. drejtor i shkollës 9-vjeçare në Maqellarë; E.M. drejtor i shkollës 9-vjeçare Kllobçisht; M.V. zv.drejtoreshë e shkollës 9-vjeçare Pocest dhe R.D. specialist i ndihmës ekonomike në Maqellarë”.
Shtabi elektoral i kandidatit të koalicionit “Aleanca për Shqipërinë Europiane” i bën thirrje organeve të drejtësisë që të veprojnë për të parandaluar dhe ndëshkuar ushtrimin e presionit ndaj zgjedhësve dhe tjetërsimin e vullnetit të tyre në prag të zgjedhjeve të 11 shtatorit.
Gjithashtu, Shtabi elektoral i kandidatit të koalicionit “Aleanca për Shqipërinë Europiane” u bën thirrje të gjitha misioneve të vëzhgimit ta ndjekin nga afër dhe dokumentojnë këtë veprimtari antiligjore të eksponentëve më të lartë të Partisë Demokratike.
“Kërkojmë nga Partia Demokratike ti japë fund menjëherë presioneve tanimë të shtrira në të gjitha njësitë administrative të Bashkisë së Dibrës. Qytetarët e Dibrës nuk mund të ofendohen dhe kërcënohen. Ata duhet të zgjedhin me vullnetin e tyre të lirë kryebashkiakun e ardhshëm” përfundon deklarata.
