“Gaza ka qenë gjithmonë në luftë. Shtëpia ime u bombardua dy herë. Kam parë me sy të vdekurit”. Kështu e nis rrëfimin shqiptarja e kthyer nga Gaza, Amal Ajour, në “OFF the Record” me Andrea Dangllin duke treguar dramën e familjes së saj dhe të shumë familjeve palestineze që përballen me bombardimet izraelite dhe mungesën e ushqimit. Ajo tha se vitet e fundit Gaza ka qenë si shtetrrethim, ndërsa herë pas herë detyrohet të shpërngulej nga një vend në tjetrin.
“Unë kam jetuar shumë vite të vështira në Gaza. Gaza ka qenë gjithmonë në luftë. Çdo vit dhe jeta ka qenë shumë e vështirë. Kishim bombardime duke ecur rrugës. Kemi qenë të pasiguruar. 17 vjetët e fundit ka qenë si shtetrrethim që ishte ndaluar për të dalë jashtë dhe për të komunikuar jashtë. Rrogat e tregu për çdo gjë. Lufta ishte herë pas here, çdo vit. Kur kam jetuar aty. Gjithmonë shpërngulesha, merrja fëmijët. Shtëpia ime u bombardua dy herë. Shumë vështirësi kam kaluar atje, kam punuar me të plagosur. Kam parë me sy të vdekurit, të vrarët, fëmijët. Siç e shikoni edhe ju vetë kam kaluar momente shumë të vështira ty. Kohët e fundit është bërë më e vështirë”, rrëfen ajo.
Amal tregon se bashkëshorti i saj ka prej një jave pa ngrënë, ndërsa 700 fëmijë në këto momente rrezikojnë të vdesin nga uria.
“Ka 3 muaj që nuk ka ndihma nga jashtë dhe Izraeli i ka bllokuar ato që i ka bërë si armë urie që të vdesin më kollaj nga uria fëmijët. 700 fëmijë në këto momente rrezikojnë të vdesin nga uria. OKB ka bërë thirrje që të futen ndihma sa më shpejt se jeta e njeriut rrezikohet shumë. Të afërmit janë të lodhur e rraskapitur edhe burri im nuk ka fuqi të flasë. U bë më shumë se një javë që nuk ka ngrënë asgjë. Do të vdesin nga uria dhe familjet”, tregon ajo.
E pyetur sesi komunikon me bashkëshortin dhe të afërmit, Amal thotë se është shumë e vështirë, pasi ai dhe familja e tij shpërngulen herë pas here për shkak të bombardimeve, ndërsa çmimet e ushqimeve janë të papërballueshme.
“Shumë herë ai dhe familja shpërngulet, nga qyteti në qytet nga vendi në vend se ato shpërndajnë fletushka për zonat që duan të bombardojnë dhe njerëzit marrin plaçkat, çadra çdo muaj çdo javë. Kishte një javë që u shpërngul nga një vend në tjetrin. Është bërë shumë e vështirë ndihmat shiten me çmime shumë të larta që populli mos të ketë mundësi të blejnë. Shteti izraelit fut matrapazët e banditët që të shfrytëzojnë njerëzit dhe të krijojnë armiqësi”, theksoi ajo.
Nga studio e A2 CNN ajo i dërgoi edhe një mesazh kryeministrit Edi Rama për të qenë të bashkuar kundër gjenocidit. Sipas saj Izraeli do të shfarosë popullin palestinez për të krijuar një Izrael të madh.
“Unë dua t’i dërgoj mesazh Ramës: Duam të ecim me të vërtetën me realitetin të shohim të vërtetën përpara për jetën e njerëzve. Aty po vriten fëmijë njerëz të pafajshëm që nuk kanë asnjë interes asnjë lidhje me terrorizmin. Ky është justifikim nga Izraeli për të shfarosur popullin palestinez për të krijuar një Izrael të madh. Prandaj ne duhet të kemi të bashkuar dhe kundër gjenocidit. Kemi familjet tona atje që ato po vuajnë nga uria dhe mungesa e ushqimit dhe po vdesin nga bombardimet”.
