Në studion e emisionit “Një Shqipëri”, Mentor Nazarko kishte në lidhje me Skype një shqiptar shumë të suksesshëm në Itali. Ai është tashmë tërësisht i përfshirë në jetën sociale, ekonomike dhe politike të qytetit që lidhet hershëm me shqiptarët, si Venecia. Emiljano Biraku ka treguar mes të tjerash, se ka fatin dhe nderin që të jetë mik i studiueses Lucia Nadin prej shumë vitesh.
Ai theksoi se në arkivat e Venecias gjendet një thesar i jashtëzakonshëm me dokumente, jo vetëm nga shqiptarët e vendosur atje, por edhe mbi lidhjet politike dhe strategjike që ka pasur Venecia me Shqipërinë, apo edhe gjithë ato vepra arti, që ende nuk dihen, nuk njihen. Ai tregon sesi Luçia Nadin pretendon që pavarësisht gjithë punës dhe përpjekjeve të saj, ka arritur të bëjë vetëm 10% të asaj se çfarë gjenden në ato arkiva për shqiptarët.
Kjo, pasi diferencat mes emigrimit shqiptar të atëhershëm me të sotmin, janë politikat. Dhe politikat në Republikën Serenisima, kanë qenë asgjësuese.
“Sot ka shumë venecianë me prejardhje shqiptare, dallohen nga emrat, por ata nuk e dinë. Unë mendoj se ne duhet të kemi njerëz, profesorë apo studentë në Venecie, që të merren pikërisht me këtë gjë, qoftë edhe për të çuar në vend amanetin e të parëve tanë. Sepse, duke qenë te mbyllur për 50 vjet, jemi privuar nga shumë të dhëna, të drejta dhe prestigje që na janë mohuar. Duhet ta rikthejmë historinë, duhet ta rishkruajmë atë”, tha ai.
“Rrethimin e dytë të Venecias”, Biraku e ndan në tre lloje: ai i viteve ’90, të integruar në fushat e turizmit, restoranteve, ndërtimit. Ndërsa, aktualisht, mund të ketë rreth 80-100 restorante në pronësi të shqiptarëve në Venecie.
Valën e dytë, ai do të konsideronte atë viteve 2000, përgjithësisht për studime dhe të bashkimeve familjare. Ndërsa, shqiptarët e ardhur në Venecie vitet e fundit, janë ata që mund të kategorizohen si pjesa, ose vala e tretë e emigrimit.
Ai rrëfeu edhe për projektet e mëdha në të ardhmen e afërt, duke veçuar atë për kinematografinë në Venecie, qyteti ku mbahet festivali i filmit, më I rëndësishmi pas Hollywood-it. Po ashtu edhe të një akademie rreth aktrimit e me gjerë.
