Një shtetas shqiptar në Itali, i përmenduar nga media si një nga tre personat në makinën Audi RS4, e cila po ndiqet nga policia, ka shkuar në komisariat për të treguar se nuk është në makinë. Lajmi ka bërë bujë, pasi makina me ngjyrë të verdhë nuk është kapur prej shtatë ditësh dhe në ndjekje të saj janë vënë dy Lamborghini të policisë.
Shqiptari 32-vjeçar, i shoqëruar nga avokati, ka shkuar në komisariatin e policisë, për të treguar që nuk ka të bëjë me ngjarjen.
Personat që ndodhen në Audi akuzohen për grabitje dhe për shtypjen e një gruaje, me pasojë vdekjen.
Ndjekja 7-ditore e Audit ka bërë bujë dhe në Facebook është hapur një faqe për të, ku janë publikuar edhe foto në një pikë karburanti.
