Bankat dhanë më shumë kredi për qytetarët dhe sipërmarrësit shqiptarë gjatë gushtit. Të dhënat nga Banak e Shqipërisë tregojnë se pas tkurrjes gjatë korrikut, huatë e reja u zgjeruan në 29.2 miliardë lekë në gusht duke shënuar kështu nivelin më të lartë për këtë vit.
“Kjo ka ardhur kryesisht si pasojë e rritjes së kredive për blerje të pasurive të paluajtshme, ashtu siç edhe Banak e Shqipërisë ka raportuar”, tha eksperti Selim Blliku.
Marrë në harkun e tetë muajve, 11 bankat tregtare në vend kanë dhënë 191.2 miliardë lekë kredi, nga 188 miliardë në po të njëjtin hark kohor të një viti më parë. Kjo gatishmëri e bankave për të dhënë kredi, për ekspertë të fushës vjen edhe si pasojë e nivelit të ulët të kredive të këqija.
“Fakti që kryesisht kreditë hipotekore për blerje banesash vijon՞ të jenë të shëndetshme, iu jep bankave likuidit dhe shëndet financiar”, theksoi Blliku
Të dhënat nga Banka Qendrore në raport me një vit më parë, kredia e re është zgjeruar me 5.5 për qind te individët dhe 7.5 për qind te bizneset.
“Ritmet e kredisë të re te individët janë domethënëse, por është biznesi ai që mbart peshën kryesore në aktivitetin kreditues”, shtoi ai.
Zgjerimi i kredi-marrjes për qytetarët dhe sipërmarrësit shqiptarë po vjen në një kohë që normat e interesit për lekun kanë prekur nivelet më të larta të viteve të fundit.
