Puna në shtet po vijon të joshë shqiptarët. Vitin e shkuar, për 1 mijë e 510 pozicione të shpallura në administratën publike pati mbi 14 mijë e 500 aplikantë. 17.5 kërkesa për një vend të lirë pune. Rritja e pagave vlerësohet si arsyeja kryesore.
“Ne e dëgjojmë shpesh herë që jam lodhur ndaj do punoj në shtet. Shumë kujt puna në shtet i jep mundësinë që të bëjë edhe një tjetër punë. Fatkeqësisht, këto janë ende faktorë”, tha për A2 CNN, Emin Shini, ekspert i tregut të punës.
Në raport me 2023-shin, interesi për vendet e punës të hapura në shtet u rrit ndjeshëm. Treguesi i aplikimeve për çdo vend pune ishte pak më i ulët se në 2022-shit, por gjithsesi mbi mesataren e dekadës së fundit.
“Duhet të kemi parasysh që rritja e rrogave nuk prek të gjitha pozicionet. Nuk është se ka uniformitet. Privati vijon të ketë paga më të mira dhe më shumë larmishmëri pozicionesh. Kemi gjithashtu shumë individë që vetëpunësohen.”
Të dhënat nga Departamenti i Administratës Publike tregojnë se nga rreth 1 mijë e 500 pozicione të shpallura vjet, u zunë 1 mijë e 221 prej tyre. Thënë ndryshe u mbushën 81 për qind e vendeve bosh.
“Po ndodh ajo që pritej. Privati dhe publiku shkojnë paralel me njëri-tjetrin. Madje mund të them se jam i surprizuar në plotësimin mbi 80 për qind të vendeve të shpallura”, shtoi Sheni.
Sipas raportit të Departamentit të Administratës Publike, viti i shkuar shënoi ndër nivelet më të larta të punonjësve të larguar nga puna me 396 raste. Kjo si pasojë e dorëheqjeve me 140 raste, ndjekur nga dalja në pension me 117 raste dhe masat disiplinore për lagim nga puna.
