Përdorimi i kartave bankare po redukton gjithnjë e më shumë qarkullimin e parasë cash.
Sipas të dhënave nga Banka e Shqipërisë, numri i kartave bankare ka shënuar nivelin 940 mijë, ose 78 mijë më shumë se një vit më parë. Në harkun e pesë viteve të fundit, numri i kartave bankare është rritur me 35%, çka reflekton rritjen e përdorimit të instrumenteve të pagesave bankare nga publiku shqiptar.
Sot afërsisht një çdo tre shqiptarë zotëron një kartë bankare. Shumica e kartave të lëshuara nga sistemi bankar shqiptar i takojnë shoqatave të mëdha globale të pagesave, si “Visa”, “Master Card”, apo “American Express”, që mund të përdoren për të kryer pagesa pothuajse në të gjithë botën.Përdorimi ende i pakët i kartave të kreditit lidhet edhe me faktin se përdorimi i kartave ngelet ende i dominuar në operacionet më të thjeshta, që janë tërheqjet e parave cash nga bankomatet. Nga 185 miliardë lekë veprime me karta gjatë vitit 2015, mbi 92% janë tërheqje cash. Sidoqoftë, edhe pagesat përmes pikave elektronike të shitjeve, të vendosura në njësi tregtare, kanë arritur vlera të konsiderueshme, me afro 12.3 miliardë lekë ose rreth 88 milionë euro për vitin 2015.
Mbi 91% e kartave bankare, janë karta debiti të lidhura me llogaritë rrjedhëse të individëve. Kartat e kreditit ngelen ende pak të përdorura në krahasim me tregjet e tjerë, megjithatë edhe numri i tyre është rritur ndjeshëm gjatë viteve të fundit. Sipas Bankës së Shqipërisë, në fund të Qershorit 2015, numri i kartave të kreditit arriti në mbi 81 mijë. Në harkun e pesë viteve të fundit numri i kartave të kreditit është rritur me afro tre herë.
