Numri i martesave në Shqipëri ka shënuar rënie rekord gjatë vitit 2024, duke arritur nivelin më të ulët historik që nga viti 1990.
Sipas të dhënave të INSTAT, të publikuara nga Monitor.al, vitin e kaluar u regjistruan vetëm 16 mijë e 120 martesa, një rënie prej 7.7% krahasuar me vitin 2023 dhe mbi 18% më pak se në vitin 2021, që shënonte kulmin e dekadës së fundit me mbi 19 mijë celebrime.
Ekspertët e lidhin këtë rënie me faktorë të shumtë, ku kryesorët janë emigracioni i lartë i të rinjve dhe pasiguria ekonomike që i shtyn çiftet të shtyjnë ose shmangin martesën. Pandemia, kostoja e lartë e jetesës dhe mungesa e mbështetjes për familjet e reja kanë thelluar më tej këtë trend. Përshembull, goditja e pandemisë në vitin 2020 e uli ndjeshëm numrin e martesave në 17 mijë e 473. Në 2021 u shënua një rritje e përkohshme në 19 mijë e 709 të tilla, si pasojë e shtyrjes së ceremonive nga pandemia. Pas kësaj, rënia rifilloi me shpejtësi nga 18 mijë e 781 martesa në vitin 2022 në 17 mijë e 467 në vitin 2023 dhe 16 mijë e 120 të tilla në vitin 2024.
Rënia e martesave ka një ndikim të drejtpërdrejtë në lindje, të cilat kanë rënë me 6.5% vetëm në gjysmën e parë të vitit 2025, duke çuar shtesën natyrore të popullsisë drejt zeros. Në disa qytete, tkurrja ishte më e lartë se 35%.
Në artikullin e Monitor.al theksohet se Shqipëria po përjeton një cikël demografik me më pak martesa, më pak fëmijë dhe një popullsi që po plaket me ritme të shpejta.
