Në Shqipëri një fëmijë i moshës 6-vjeçare (mosha e përcaktuar me ligj për të filluar shkollën në vend) pritet të ndjekë arsimin përafërsisht 14 vjet. Kjo do të thotë që rreth 19 përqind e pjesës që mbetet nga jeta e fëmijës (merret për bazë jetëgjatësia mesatare 72.6 vjeç) do të kalohet në arsim.
Tërësia e viteve të shkollës për fëmijët shqiptarë nga mosha 6 vjeçare është nën atë të çdo vendi të BE-së. Sipas grafikut të mëposhtëm, që tregon tërësinë e viteve të shkollës nga mosha 6 vjeç në Shqipëri dhe vendet e përzgjedhura në rajon dhe më gjerë, Shqipëria është renditur pothuajse në të njëjtat nivele me Maqedoninë.
Këto rezultate të bëra publike nga INSTAT, tregojnë se kjo pjesë e jetës në arsim është e njëjtë për vajzat dhe djemtë, por si jetëgjatësia ashtu edhe tërësia e viteve të shkollës për vajzat është më e lartë.
“Një fëmijë që hyn në fazën e jetës së rinisë ka mesatarisht akoma 5.2 vite arsim përpara, vajzat disi më shumë dhe djemtë disi më pak.”- thuhet në raport.
Kjo shifër në moshën 20 vjeçare është ulur në 1.8 vjet dhe ka rënë më tej në 0.6 vjet për të rinjtë më të mëdhenj të moshës 29 vjeç.
Megjithatë, sa i përket jetëgjatësisë, Shqipëria paraqitet mirë mes këtyre vendeve.
MONITOR
