Mediat britanike rikthejnë në vëmendje të publikut shqiptarët që emigrojnë drejt vendit ishullor të cilët përpiqen me mënyra të ndryshme t’i mbijetojnë dëbimeve të autoriteteve. Një artikull i ‘Daily Mail’ tregon se ‘bandat’ shqiptare krijojnë lidhje me firma ligjore që paguajnë profesionistë mjekësorë për të ndihmuar në pengimin e dëbimit përmes raporteve false. Burimet e ‘Daily Mail’ flasin për prova të avokatëve që merrnin raporte të dyshimta ‘mjeko-ligjore’ për klientët e tyre.
Raportet e dyshimta lëshohen nga psikoterapistët dhe psikologët me kualifikime ‘të dobëta’ të cilët në raportet e tyre pretendojnë se shqiptarët, në veçanti, janë shumë të lodhur nga ana psikologjike, ndaj nuk janë në gjendje që të japin intervista.
Media britanike përmes burimeve ka mësuar se raporte false lëshohen nga firma te vogla te krijuara nga përfaqësues ligjorë dhe këshilltarëve të emigracionit që janë të përfshirë në një lloj lidhjeje kriminale. Edhe pas mbylljes ligjore ata sërish hapin të njëjtin shërbim me emra të reja kompanish.
Daily Mail citon një të afërm të një shqiptari të ndaluar i cili i ka shkruar autoriteteve britanike se si i kishin paguar 5000 Paund një firme ligjore për t’i liruar. Dhe kur lirimi nuk ndodhi me anë të raportit të blerë, ata u ankuan dhe madje zbuluan firmën ligjore të përfshirë.
Home Office ka forcuar rregullat për raportet mjeko-ligjore, duke përfshirë edhe kush mund t’i shkruajë ato.
Hulumtimet e reja tregojnë se në shtatë vitet e fundit, gati gjysmë miliardë Paund janë shpenzuar nga qeveria në përpjekje për të parandaluar kalimin e emigrantëve.
/a.r
