Të marrësh para borxh edhe për qejf. Të paktën këtë prirje duket se po ndjekin shqiptarët vitet e fundit për të financuar jo vetëm pushimet verore, por edhe blerje të ndryshme.
Sipas të dhënave të bankës së Shqipërisë, verën e kaluar bankat ofruan 390 milionë lekë në formën e overdrafteve në euro, një shifër që pritet të tejkalohet edhe gjatë kësaj periudhe.
“Lidhet me entuziazmin e tyre, por edhe me nevojën për të plotësuar kërkesat në familje. Po të shohim kohët e fundit, një pjesë e madhe e elektroshtepiakëve apo celularëve financohen nga institucionet financiare të kreditimit, të cilat u mundësojnë qytetarëve t’i blejnë me këste”, thotë Artur Ribaj, ekspert banker.
Rritja e përdorimit të kësaj forme huamarrjeje, por edhe e kredive konsumatore në tërësi, sipas ekspertëve është një tregues që lidhet edhe me nivelin e mirëqenies ekonomike të familjeve.
“Nga ana tjetër, kjo tregon edhe rritje të varfërisë, sepse po të kishe mundësi ta blije vetë, nuk do të merrje kredi. Pra, sa më shumë të rritet kredia konsumatore, aq më shumë do të thotë se individët po marrin hua për shpenzime dhe jo për investime”, thotë Artur Ribaj, ekspert banker.
Megjithëse overdrafti është krijuar si një instrument financiar për të përballuar nevoja të përkohshme për likuiditet, ekspertët thonë se ai po përdoret gjithnjë e më shumë për konsum të zakonshëm.
“Overdraftin duhet ta kesh për një moment të caktuar, jo ta mbash për muaj apo vite për të bërë blerje, sepse kthehet në një barrë të panevojshme. Ai është një nga produktet me normat më të larta të interesit. Çdo njeri që do të blejë diçka duhet të përpiqet ta bëjë me të ardhurat e veta dhe të mos rrezikojë duke u mbështetur te overdraft”, sqaron eksperti Ribaj.
Përveç sezonit veror, periudha tjetër kur vihet re një rritje e fluksit të marrjes së overdrafteve është fundi i vitit, konkretisht muaji dhjetor.
