Trajneri De Biazi e sqaroi pozicionin e tij në krye të kuqezinjve përpara kryeministrit Edi Rama, në takimin që kreu i ekzekutivit shqiptar organizoi me rastin e kthimit të kombëtares nga “Euro 2016”. Ai tha se do ta vijojë këtë mrekulli. Kjo, për faktin se është nën kontratë edhe për fushatën eliminatore të “Botërorit 2018”. Por, 60-vjeçari nga Sarmede e Italisë ndryshe flet këtu e ndryshe në vendin e tij. Ai duket qartë se e ka mendjen të fillojë ndonjë eksperiencë të re, aq më tepër nëse ajo është më joshëse financiarisht dhe sportivisht se Shqipëria. Vetë presidenti Armand Duka ka thënë se nuk do ta pengojë të largohet, të ikë për një mundësi më të mirë, por nga ana tjetër duhet qartësuar njëherë e mirë puna e trajnerit tonë të kombëtares, sepse eliminatoret e “Botërorit 2018” janë të dera, nisin në shtator, ndaj s’mund t’i lihet rastësisë zgjedhja e timonierit të kuqezinjve.
Për “gomë rezervë” të De Biazit nuk mund të shërbejë kurrsesi kombëtarja shqiptare, ndaj duhen vënë pikat mbi “I” në këtë drejtim. Menjëherë pas dorëheqjes së Roy Hodgson, trajnerit të Anglisë, De Biazi është vetëofruar për këtë post, edhe pse duket një “stacion” i pakapshëm për “kredencialet” e tij. Të kishte bërë atë që po vijon Islanda në finalet e turneut të Francës, veç kualifikimit historik, ndoshta mund t’i lakohej emri ndokund në ishull. Sidoqoftë, një gjë është e kristaltë: ai është gati t’i lërë kuqezinjtë, sikurse e tregoi këtë edhe në rastin e “ankandit” për pasuesin e Antonio Kontes tek Italia. Mediat italiane shkruajnë sot se, për të zënë vendin e trajnerit të dorëhequr të kombëtares angleze vetëofrohet edhe trajneri i Shqipërisë, Xhani De Biazi.
Në një intervistë të dhënë për “Radio 1 Rai”, i pyetur nëse ekzistonte mundësia që të largohej nga Shqipëria për të marrë drejtimin e Anglisë, 60-vjeçari dha këtë përgjigje: “Ekziston si mundësi, nuk e di se sa e realizueshme është, por ekziston. Unë uroj që të ndodhë. Në kontratën time me Federatën Shqiptare të Futbollit ka një klauzolë, që më lejon mua ta ndërpres atë, por tani për tani zgjedhja për ta lënë këtë kombëtare do të jetë e vështirë nga pikëpamja emocionale.” De Biazi nuk e ka fshehur se kishte pasur mundësi për t’u ulur në stolin e axurrëve: “Ne kemi qenë në një konkurrencë mjaft të ngushtë. Do të ishte qesharake për të thënë se nuk do ta doja atë post. Një italian gjithmonë dëshiron për të trajnuar ekipin e vet kombëtar. Ndoshta do të ndodhë në të ardhmen.” (telesport.al)
