Është miratuar sot, 21 tetor, në Komisionin e Ekonomisë dhe Financave me disa ndryshime, Projektligji për “Barazinë Gjinore”.
Kështu, kanë marrë fund debatet e forta lidhur me frazën “gjinia gjithpërfshirëse”, që ishte në projektligjin e hedhur për konsultim publik në mars të këtij viti.
Me 22 amendamentet e propozuara nga grupi parlamentar i Partisë Socialiste, janë rregulluar disa nene në draftin e qeverisë në Kuvend, ku tanimë specifikohen vetëm dy gjini, “burrë dhe grua”…Lexo më shumë
Grupi parlamentar ka hequr fjalët “pavarësisht përkatësisë gjinore” duke u zëvendësuar me “trajtim të barabartë mes grave dhe burrave”.
Po ashtu, thuhet se togfjalëshat “përkatësi gjinore” apo “përkatësi e shumëfishtë” nuk harmonizohen me legjislacionin në fuqi që njeh vetëm burrin dhe gruan si gjini. Termi “përkatësi e shumëfishtë” përdorej në plot 15 raste në draftin e qeverisë.
Pavarësisht ndryshimeve si më sipër të paraqitura nga ana e socialistëve, opozita e ka konsideruar një reagim të vonuar. Në mbledhjen e komisionit, deputeti demokrat, Bujar Leskaj, ka deklaruar se termat fillestarë në draftin e projektligjit, rrezikonin të cenonin vetë konceptin biologjik të gjinive.
“Me termin ‘përkatësi e shumëfishtë’, ju godisni konceptin jetik të shoqërisë njerëzore të dy gjinive, mashkull dhe femër. Krijohet konfuzion dhe ngatërrohet qëllimisht gjinia me orientimin seksual”, mësohet të ketë thënë Leskaj. Të njëjtin qëndrim ka mbajtur edhe deputeti Eno Bozdo.
Ndërkohë, zëvendësministrja e Shëndetësisë dhe Mbrojtjes Sociale, Denada Seferi, ka sqaruar se ligji nuk kishte për qëllim riformulimin e nocioneve gjinore, por përmirësimin e kuadrit të politikave për barazinë e grave dhe burrave në fusha të ndryshme të jetës.
“Ky ligj nuk përcakton gjini. ‘Përkatësia e shumëfishtë’ nënkupton raste ku një grua, për shembull, është rome, jeton në zonë rurale dhe ka aftësi të kufizuara. Pra, ka disa shtresa diskriminimi të mbivendosura”, shpjegoi Seferi.
Tashmë, pritet që projektligji mjaft i diskutuar të miratohet në seancë plenare.
