Kufiri i gjelbër me Greqinë kohët e fundit është kthyer në një portë të kalimit të emigrantëve të paligjshëm që mbërrijnë nga vendet e Lindjes së Mesme por jo vetëm. Vetëm përgjatë dy ditëve të fundit u kapën 134 emigrantë të paligjshëm, duke u transportuar nga shtetas shqiptarë.
Në rastet e evidentuara nga policia, shtetasit shqiptarë merrnin 150 euro secilit prej emigrantëve për të kaluar drejt vendeve të BE-së. Rasti më i fundit ishte punonjësi i Gardës së Republikës, Dritan Kurra, i cili u kap në dalje të qytetit të Pogradecit, në mjetin tip “Chevrolet” duke transportuar 5 emigrantë të parregullt drejt kryeqytetit.
Ndërkohë u përballën me togat e zeza disa të dyshuar për kalim të paligjshëm kufiri të shtetasve të huaj.
Gjykata e Tiranës liroi nga qelia 4 nga 5 të arrestuarit e operacionit kompleks për transport të emigrantëve të parregullt. Në qeli do të qëndrojë vetëm 26-vjeçari Rigers Vejsiu, i cili rezulton përsëritës për këtë vepër penale.
Gjykata la në arrest shtëpie dy të rinjtë nga Korça, Sterjo Gërmenji, 26 vjeç, Anamaria Mihallari., 24 vjeçe si dhe dy motrat Drita Shehu, 55 vjeçe, Sanije Shehi, 64 vjeçe.
Gërmenji dhe Mihallari që u kapën me 4 klandestinë, thane se nuk kanë lidhje me grupin e trafikimit, pasi sipas tyre i kanë marrë rastësisht në rrugë, duke ardhur në Tiranë. Ndërsa dy motrat të cilave iu kapën emigrantë të huaj në hostelet e tyre në Laprakë, deklaruan se nuk mbajnë përgjegjësi për klientët që frekuentojnë bizneset e tyre.
Nga prokuroria u ngritën dyshime se këta shtetas, kishin të organizuar edhe një linjë tjetër trafikimi të shtetasve të huaj që hynin me dokumentacion të rregullt në vendin tonë për qëllime turistike apo punë me leje qëndrimi, të cilët vinin në mënyrë legale dhe kaloheshin në Kosovë ilegalisht.
/a.r
