Kjo hartë e botës tregon zonat ku koronavirusi është i prirur për t’u përhapur më së shumti. Brezi i gjelbër ku bën pjesë edhe Shqipëria është zona që ka kushtet më të favorshme për këtë virus që vijon të përhapet me ritme të shpejta.
Harta është përpiluar nga shkencëtarët e Universitetit të Merilendit, të cilët thonë se i ashtuquajturi “korridor i gjelbër” ka temperatura mesatare 5 deri 11 gradë Celsius dhe nivel lagështie që varion nga 47 deri 79%.
Brenda këtyre standardeve është veçanërisht rajoni i Lombardisë në veri të Italisë, vatra e përhapjes së koronavirusit në botën Perëndimore, që për periudhën Janar – Shkurt kur u shënua përhapja masive e virusit, temperatura mesatare ishte 9 gradë Celsius dhe lagështia mes 68 deri 75%, shkruan “klan”.
Pikërisht në këtë periudhë u përhap virusi edhe në Wuhan të Kinës, kur u shënua një mesatare temperaturash prej 6.8 gradë Celsius. Në të njejtin nivel është Seuli, Teherani e të tjerë vende ku është përhapur masivisht koronavirusi.
Vendet imune, mesa duket janë ato që shtrihen pranë brezit të Ekuatorit. Ekspertët besojnë se në verë koronavirusi mund të zhduket, por mund të rikthehet përsëri në Vjeshtë. /e.s/
