Shqipëria do të mbajë frymën sot në orën 18:00 e sidomos në mbrëmje, me ndeshjet e Gjermanisë dhe Turqisë. Dje iku një nga ndeshjet ku ne shpresonim të merrnim “pikë”, Anglia kundër Sllovakisë. Duhej një fitore 3-0 e “Luanëve” kundër sllovakëve, gjë që rezultoi e pamundur.
Barazimi pa gola e çoi Sllovakinë në kuotën e katër pikëve, duke e bërë një skuadër të tretë të paarritshme nga kuqezinjtë.
Sot shpresojmë në një tjetër rezultat të thellë, madje më tepër se ai që shpresonim të arrinte Anglia. Nëse Gjermania fiton 4-0 kundër Irlandës së Veriut, kjo e fundit renditet në vendin e tretë, por pas Shqipërisë, për shkak të golaverazhit më të dobët. Katër gola janë shumë, por… mund të ndodhë. Gjermania nuk ka treguar thuajse asgjë nga fuqia e saj sulmuese dhe të gjithë janë nën akuzë. Thomas Müller ende nuk ka shënuar dhe tre ndeshje radhazi pa gol për të gjithë sulmin gjerman (deri tani kanë shënuar Mustafi e Schweinsteiger) nuk mund të vazhdojë gjatë. Për më tepër, Gjermania ende nuk e ka siguruar kualifikimin, të cilin e merr edhe me një pikë, ndërkohë që vendin e parë me shumë gjasa mund ta marrë vetëm me golaverazh kundër Polonisë.
Gjithsesi, fitorja 4-0 nuk është pretendim i vogël ndaj vëmendja më e madhe është në mbrëmje, te Turqia. Llogaritë këtu janë më të thjeshta. Çekia nuk duhet të fitojë me Turqinë. Në rast se barazon, shkon dy pikë, pra një më pak se Shqipëria. Nëse fiton Turqia, por vetëm me një gol diferencë, del e treta e grupit dhe prapa Shqipërisë, falë golaverazhit. Fitorja me dy gola diferencë i ngre turqit mbi kuqezinjtë, falë numrit të golave të shënuar.
Nëse realizohet skenari i dëshiruar në ndeshjet e Gjermanisë e të Turqisë, atëherë Shqipëria sot në mbrëmje feston kualifikimin.
Nëse arrihet vetëm njëra, atëherë vëmendja shkon te ndeshjet e nesërme, e sidomos te grupi i Italisë, ku gjithashtu llogaritë janë të thjeshta: Mjafton që Italia e Belgjika të mos munden nga Irlanda e Suedia. Barazimi ose humbja e Irlandës me Italinë janë rezultat i domosdoshëm, ndërsa në rastin e Belgjikës e Suedisë ekziston edhe varianti i vështirë e thuajse i pabesueshëm i një fitoreje 4-0 të suedezëve, që i kualifikon ata dhe lë belgët në vendin e tretë por poshtë Shqipërisë.
d.i.
