Më 21 shtator 2026, në Akademinë e Shkencave të Shqipërisë në Tiranë, u zhvillua Asambleja XIII e Përgjithshme e Unionit të Akademive Evropiane për Shkencat e Zbatuara në Bujqësi, Ushqim dhe Natyrë (UEAA), së bashku me mbledhjen e Komitetit Drejtues.
Në kuadër të aktivitetit u zhvillua edhe simpoziumi shkencor ndërkombëtar “Bujqësi e qëndrueshme evropiane dhe menaxhim i balancuar i burimeve natyrore”, me pjesëmarrjen e akademikëve, profesorëve dhe ekspertëve nga vende të ndryshme evropiane.
Gjatë Asamblesë së Përgjithshme u miratuan raportet institucionale dhe u zgjodhën organet drejtuese për mandatin 2026–2028. Akademiku Nazim Gruda u zgjodh me votë unanime President i UEAA-së, duke sjellë Presidencën e Unionit në Shqipëri për dy vitet e ardhshme.
Prof. Dr. Simone Orlandini, nga Accademia dei Georgofili, Itali, u zgjodh zëvendëspresident. Gjithashtu, u zgjodhën 12 anëtarë të Komitetit Drejtues dhe 7 anëtarë vëzhgues nga akademitë evropiane, mes tyre edhe një përfaqësues nga Akademia e Shkencave dhe e Arteve e Kosovës.
