Sapo ka përfunduar rrugëtimi muzikor në skenën e madhe të “Junior Eurovision Song Contest 2025”. Përfaqësuesja e Shqipërisë, Kroni Pula, ka dhuruar një performancë mbresëlënëse pak minuta më parë, duke e mbyllur natën magjike si konkurrentja e 18-të dhe e fundit në radhë.
Atmosfera në sallë
Me këngën “Fruta Perime”, Kroni arriti të ngrejë peshë sallën me spektatorë. Energjia e saj vokale dhe skenike u prit me duartrokitje të forta, ndërsa në plate nuk munguan as flamujt kuqezi që valëviteshin në mbështetje të saj.
E veshur me plot stil dhe e shoqëruar nga katër bashkëmoshatare që plotësuan numrin artistik me një koreografi dinamike, Kroni dëshmoi talentin e saj duke përfaqësuar denjësisht ngjyrat e flamurit.
Hapet votimi, momenti për të mbështetur Shqipërinë
Me përfundimin e performancës së Shqipërisë, e cila mbylli edhe prezantimin e 18 këngëve konkurrente, spektakli ka hyrë në fazën e tij më të nxehtë: Votimin.
Tashmë, fati i këngës është në duart e publikut. Të gjithë shqiptarët dhe artdashësit kanë mundësinë të votojnë tani për Kroni Pulën. Kjo është thirrja për të mbështetur jo vetëm një performancë të shkëlqyer vokale, por edhe një mesazh të domosdoshëm për kohën: dashurinë për tokën, ushqimin e shëndetshëm dhe gëzimin e jetës.
Votimi kryhet online dhe është vendimtar për renditjen përfundimtare.
