Zona e Ujit të Ftohtë në Tepelenë u bë mikpritëse e mbledhjes së Ministrave të Komunitetit të Energjisë, teksa Shqipëria, si organizatore, drejton Presidencën e këtij Komuniteti për vitin 2023.
“Vendi më i mirë për t’u promovuar gjatë 2023 ishte padyshim Vjosa, duke qenë se është shpallur këtë vit park kombëtar, kështu që vendosëm ta bënim në këtë zonë”, u shpreh zv/Kryeministrja Belinda Balluku.
Komuniteti mblodhi ministra të vendeve të Komunitetit të Energjisë, përfaqësues nga Komisioni Evropian dhe përfaqësues të Sekretariatit të Komunitetit të Energjisë për të diskutuar tema kritike që lidhen me peisazhin energjetik të rajonit dhe zbatimin e udhërrëfyesit për dekarbonizimin, për të garantuar një tranzicion të gjelbërt.
Miratimi i një sistemi efektiv të tregtimit të emetimeve u njoh si një hap vendimtar drejt promovimit të neutralitetit të karbonit dhe reduktimit të emetimeve të gazeve serrë në të gjithë Komunitetin e Energjisë, ndërsa u prezantua edhe rregullorja e Komisionit Europian për sistemet e emetimit të karbonit.
“Përparim i shpejtë në fushat e energjisë elektrike integrimi dhe një qasje e përbashkët për çmimin e karbonit do të jenë thelbësore, duke marrë parasysh procesin e pranimit në BE, në realizimin e potencialit të plotë të tregut të brendshëm të energjisë për energjinë elektrike, lehtësimin e tranzicionit të energjisë së gjelbër në përputhje me objektivat e Marrëveshjes së Gjelbër të BE-së”, thotë Artur Lorkowski, drejtor i Sekretariatit të Komunitetit të Energjisë.
Ministrja e Infrastrukturës dhe Energjisë dhe zv/Kryeministrja Belinda Balluku, vlerësoi rolin e Shqipërisë në këtë çështje.
“Kemi diskutuar gjerësisht për agjendën e dekarbonizimit ku Shqipëria është në pozicionin më të mirë nga i gjithë rajoni, duke qenë se emetimet e karbonit në Shqipëri janë minimale dhe vijnë vetëm nga transporti, pra nuk kemi emetime nga industria apo nga prodhimi i energjisë, duke qenë se energjia në Republikën e Shqipërisë është e gjitha e rinovueshme”.
Një tjetër pikë e rëndësishme e rendit të ditës u fokusua në vlerësimin e mësimeve të nxjerra nga stinët e mëparshme të Dimrit dhe identifikimin e hapave të ardhshëm për të siguruar gatishmëri më të mirë për Dimrin e ardhshëm.
Pjesëmarrësit ndanë përvojat dhe praktikat më të mira për të rritur sigurinë energjetike dhe për të mbajtur furnizime të qëndrueshme me energji gjatë kushteve sfiduese të Dimrit.
Zv/Kryeministrja Belinda Balluku shprehu gjithashtu mbështetjen aktive të Shqipërisë për krijimin e një kuadri rajonal për tregtimin e emetimeve.
“Sot dëgjuam ministren serbe që bëri një ekspoze se si po përgatiten që në muajt në vazhdim, Serbia të lançojë ankandin e parë të energjisë së rinovueshme, gjë të cilën ne e kemi bërë me sukses që në vitin 2020”.
Komuniteti Ministror i Energjisë është institucioni që përfaqëson qeveritë e Palëve në Traktatin e Komunitetit të Energjisë. Ai është organi më i lartë dhe mblidhet zyrtarisht të paktën një herë në vit për të diskutuar dhe marrë vendime kyçe për çështjet e lidhura me energjinë.
/f.stafa
