Mes 284 dispozitave të ndryshuara apo të shtuara në Kodin e Procedurës Penale, në nenin 449 ndalohet rishikimi i vendimit të pafajësisë, një ndalim që u lexua si aministi për disa zyrtarë të lakuar në dosje të bujshme vitet e fundit. Por Artan Hoxha, eksperti i nivelit të lartë, gjithashtu pedagog i së drejtës proceduriale penale, shpjegon se cili është kuptimi i këtij neni.
“Ne kemi pranuar një standard ndërkombëtar të përparuar që vendimi i pafajësisë nuk rishikohet, pavarësisht nëse rezultojnë prova të mëpasshme që nuk janë marrë në shqyrtim nga gjykatat, të cilat edhe me rregullimin e mëparshëm kishin një afat pesëvjeçar. Duhet rritur përgjegjshmëria e autoriteteve që merren me procesin penal. Parimi “ne bis in idem”, pra jo dy herë për të njëjtin fakt është një parim që nuk duhet të jetë vetëm në letër, por të bëhet real”, deklaron Hoxha. /ma.me
