Shqipëria ka zbritur dy vende në renditjen mujore të FIFA-s, për muajin dhjetor 2015, e cila është publikuar sot. Sikurse duket, dy barazimet në miqësoret e nëntorit, me të njëjtin rezultat, 2-2, ndaj Kosovës (kjo nuk merret në llogari, në fakt) dhe ndaj Gjeorgjisë i ka penalizuar disi kuqezinjtë e De Biazit. Nga vendi i 36-të që mbanin muajin e kaluar, tani pozicionohen të 38-tët në rang-listën e kombëtareve të botës. Sa i përket kryesimit të kësaj renditjeje, ruan pozitat e liderit Belgjika, e ndjekur nga Argjentina dhe Spanja.
Kombëtarja e Shqipërisë ka arritur kualifikimin historik, shkuarjen në finalet e “Euro 2016”, ndaj çdo lajm tjetër i kësaj periudhe nuk e prish festën kuqezi. As zbritja me dy vende për dhjetorin, as zbritja me katër vende në renditjen e FIFA-s për muajin nëntor 2015. Nëse muajin tetor ishim në vendin e 32-të, herën e kaluar në vendin e 36-të, tashmë pozicionohemi të 38-tët.
Trajneri De Biazi dhe të tijtë kishin mundësinë që përmes miqësores së nëntorit, ndaj Gjeorgjisë, t’i rifitojnte pozicionet e humbura, por barazimi 2-2 ka bërë të kundërtën. Kjo qasje ishte konstatuar edhe në muajin shtator, para ndeshjeve kualifikuese me Serbinë dhe Armeninë. Renditja mujore e FIFA-s për tetorin i shihte kuqezinjtë e De Biazit minus 7 vende, krahasuar me renditjen e muajit pararendës (shtator 2015). Më konkretisht, nga vendi i 25-të, që mbante në shtator, kombëtarja shqiptare e pa veten në vendin e 32-të.
‘Telesport.al’ shkruan se shkak për këtë rend zbritës në muajt e fundit sigurisht janë bërë ndeshjet kualifikuese të shtatorit, ku De Biazi dhe të tijtë barazuan në Kopenhagë me Danimarkën dhe humbën në “Elbasan Arena” ndaj Portugalisë, ashtu sikurse ishte humbja me Serbinë në “Elbasan Arena”, si dhe mosfitimi në miqësoret e nëntorit. Kujtojmë se kulmin e kulmeve në këtë renditje, Shqipëria e pati në muajin gusht 2015, vendin e 22-të në FIFA. Një rekord historik në ranglistën e kombëtareve të gjithë Botës.
