Shqipëria eksporton 991 GWh energji në 3 muaj, rritet prodhimi nga hidrocentralet dhe burimet e rinovueshme

Sektori i energjisë elektrike në Shqipëri ka shënuar një ecuri pozitive gjatë tremujorit të dytë të vitit 2026, i udhëhequr nga një rritje e ndjeshme e prodhimit vendas dhe zgjerimi i eksporteve. Sipas të dhënave të publikuara nga Instituti i Statistikave (INSTAT), prodhimi neto vendas arriti në 2.361 GWh, duke shënuar një rritje prej 34,4% krahasuar me të njëjtën periudhë të vitit 2025.

Rritja e prodhimit vendos një bazë të fortë për përmbushjen e nevojave vendase dhe ka ulur varësinë e vendit nga blerjet e jashtme të energjisë.

Prodhimi sipas burimeve dhe ulja e importit

Prodhimi energjetik gjatë kësaj periudhe u dominua nga hidrocentralet publike, por me një kontribut në rritje të burimeve të rinovueshme:

• HEC-et Publike: Realizuan 42.8% të prodhimit gjithsej (1.011 GWh), me një rritje prej 43.6% ndaj vitit të kaluar.
• HEC-et Private dhe Koncesionare: Mbuluan 38.2% të prodhimit (903 GWh), duke shënuar një rritje prej 18.0%.
• Prodhuesit e tjerë (Energjitë e Rinovueshme): Kontribuuan me 19.0% (448 GWh), me një kërcim prej 55.6% krahasuar me T2 2025.

Si rezultat i rritjes së prodhimit vendas, importi bruto u ul me 21.5%, duke zbritur në 569 GWh. Në të njëjtën kohë, eksportet e energjisë pësuan një rritje prej 55.4%, duke kapur vlerën e 991 GWh. Kjo solli një shkëmbim neto pozitiv prej 422 GWh në favoret e rrjetit shqiptar.

Konsumi dhe performanca e rrjetit

Energjia elektrike në dispozicion arriti në 1.939 GWh, një rritje prej 5.1% krahasuar me vitin e kaluar. Përdorimi nga konsumatorët pësoi rritje në të dyja kategoritë kryesore:

Humbjet në rrjet mbetën thuajse në të njëjtat nivele (320 GWh), por pesha e tyre ndaj energjisë në dispozicion u ul me 0,8 pikë përqindjeje, duke zbritur në 16.5%. Ndonëse humbjet në transmetim shënuan rritje prej 20.4%, humbjet në rrjetin e shpërndarjes pësuan një ulje prej 3.1%.