Shqipëria dhe Maqedonia e Veriut po hedhin një tjetër hap për lehtësimin e kalimit në kufi. Administratat doganore të dy vendeve kanë nisur hartimin e një Protokolli të ri për zbatimin e kontrolleve të përbashkëta kufitare, me synimin për të përshpejtuar procedurat doganore, për të ulur kohën e pritjes dhe për të lehtësuar tregtinë e lëvizjen e udhëtarëve.
Për këtë arsye, delegacionet e drejtuara nga drejtori i Përgjithshëm i Doganës Shqiptare, Besmir Beja, dhe drejtori i Administratës Doganore të Maqedonisë së Veriut, Boban Nikolovski, zhvilluan një vizitë në pikën e përbashkët kufitare Qafë Thanë–Qafasan, ku diskutuan zbatimin praktik të marrëveshjes dhe finalizimin e Protokollit.
“Bashkëpunimi mes administratave tona doganore dëshmon se rezultatet arrihen kur ekziston vullneti për të punuar së bashku. Përmes këtij Protokolli do të harmonizojmë procedurat doganore, do të koordinojmë më mirë përdorimin e burimeve dhe do të forcojmë kontrollet, duke lehtësuar njëkohësisht tregtinë e ligjshme dhe lëvizjen e udhëtarëve,” u shpreh Beja.
Nga ana e tij, Drejtori i Administratës Doganore të Maqedonisë së Veriut, Boban Nikolovski, theksoi se Protokolli do të kontribuojë në uljen e kohës së pritjes në kufi, përshpejtimin e flukseve tregtare dhe rritjen e besimit të komunitetit të biznesit.
Në takim morën pjesë edhe përfaqësues të misioneve të OSBE-së në të dy vendet, të cilët e vlerësuan nismën si një hap të rëndësishëm për forcimin e bashkëpunimit ndërkufitar dhe menaxhimin e integruar të kufirit.
