Shqipëria do të dërgojë deri në 40 ushtarë në operacionin ushtarak të Forcës Ndërkombëtare të Stabilitetit, në Gaza. Gjithshka është përcaktuar në projektligjin e miratuar nga Këshilli i Ministrave një ditë më parë.
Ndër të tjera në dokument përcaktohet se misioni i personelit të Forcave të Armatosura të Republikës së Shqipërisë në operacionin ushtarak të Forcës Ndërkombëtare të Stabilitetit, në Gaza, do të jetë mbështetja e operacioneve të sigurisë dhe stabilitetit, mbrojtja e personelit, objekteve dhe infrastrukturës së misionit, mbështetja e operacioneve humanitare, monitorimi dhe raportimi i situatës së sigurisë si dhe detyra të tjera, në përputhje me mandatin e misionit, në kuadër të Bordit të Paqes.
Sa i përket trajtimit financiar, nënvizohet se ushtarakët pjesëmarrës në operacionin e Forcës Ndërkombëtare të Stabilitetit, në Gaza, përveç pagës mujore, përfitojnë dieta për ditët e qëndrimit në operacion, në masën që do të caktohet me vendim të Këshillit të Ministrave.
“Bordi i Paqes”, një iniciativë e presidentit amerikan Donald Trump, u themelua më 19 shkurt 2026, ku rreth 20 vende anëtare nënshkruan sipërmarrjen e re dhe njoftuan më shumë se 6.5 miliardë dollarë premtime financiare.
Investimi fillestar prej afërsisht 1.25 miliardë dollarësh do të shkojë për heqjen e municioneve, strehim të përkohshëm, siguri, furnizime mjekësore dhe nevoja të tjera, tha zyrtari. Rindërtimi i Gazës pritet të kushtojë rreth 53 miliardë dollarë, sipas një raporti të Bankës Botërore, OKB-së dhe Bashkimit Evropian.
Ndërkohë, sot presidenti i SHBA, Donald Trump, njoftoi se “Bordi i Paqes arriti një marrëveshje historike për çarmatimin e plotë të Hamasit dhe të gjitha grupeve të tjera të armatosura në Gaza. Ky është një hap monumental drejt paqes dhe sigurisë së qëndrueshme”, përfundon njoftimin presidenti Trump.
