Shqipëria mban sot në Bruksel konferencën e tretë ndërqeveritare Shqipëri – BE, ku do të hapen zyrtarisht negociatat për grup kapitullin VI që janë “Marrëdhëniet me Jashtë” dhe përfshin kapitujt negociues 30 dhe 31, përkatësisht “Marrëdhëniet e jashtme” dhe “Politika e jashtme, e sigurisë dhe e mbrojtjes”.
Delegacioni shqiptar kryesohet nga vetë kryeministri Edi Rama. Së bashku me të janë Ministri për Evropën dhe Punët e Jashtme Igli Hasani, Ministrja e Shtetit dhe Kryenegociatorja Majlinda Dhuka, Ministri i Mbrojtjes Pirro Vengu, Ministri i Ekonomisë, Kulturës dhe Inovacionit Blendi Gonxhja, Ministrja e Shtetit për Administratën Publike dhe Antikorrupsionin Adea Pirdeni, si dhe një delegacion të përbërë nga negociatorët përgjegjës për kapitujt përbërës (30, 31) të grupkapitullit të VI.
A2 CNN ka zbardhur agjendën e konferencës së sotme që nis në orën 8:00 të mëngjesit dhe më pas në orën 10:00 do të jetë një konferencë e përbashkët shtypi e kryeministrit Rama me ministrin Punëve të Jashtme të Hungarisë, Péter Szijjártó, dhe me Komisioneren për Fqinjësinë dhe Negociatat për Zgjerimin znj. Marta Kos.
Konferenca Ndërqeveritare i paraprin Samitit të BE dhe Ballkanit Perëndimor, i cili do të mbahet ditën e nesërme, si dhe një sërë takimeve që Kryeministri Rama dhe ministrat e kabinetit do të zhvillojnë me përfaqësues të lartë të BE.
Kjo konferencë e tretë ndërqeveritare është e dyta gjatë presidencës hungareze, pas asaj të mbajtur në Luksemburg më 15 Tetor, ku Shqipëria hapi pesë kapitujt e anëtarësimit pjesë e çështjeve themelore si Gjyqësori të Drejtat Themelore, Drejtësia, Prokurimet, Statistikat, Sigurinë dhe Kontrolli Financiar.
Agjenda
Bruksel, Konferenca Ndërqeveritare III për grupkapitullin VI: “Marrëdhëniet me Jashtë;
07.50 – Mbërritja në “Europa Building” dhe doorstep (Vendi:Europa Building)
08.00 – Hapja e Konferencës Ndërqeveritare 3 për grupkapitullin VI: “Marrëdhëniet me Jashtë”
10.00 – Konferencë e përbashkët shtypi e Kryeministrit Rama me z. Péter Szijjártó, Ministër i Punëve të Jashtme të Hungarisë (e cila mban Presidencën e Këshillit të BE), dhe znj. Marta Kos, Komisioneri për Fqinjësinë dhe Negociatat për Zgjerimin.
/a.r
