Shqipëria është rreshtuar krah Shteteve të Bashkuara të Amerikës, Mbretërisë së Bashkuar, Kanadasë, Gjermanisë, Francës dhe dhjetë vendeve të tjera evropiane në një deklaratë të përbashkët që dënon ashpër kërcënimet në rritje të Iranit ndaj qytetarëve perëndimorë përfshirë edhe ata në territorin shqiptar.
“Jemi të gjithë të një mendjeje: Irani duhet të ndalë menjëherë sulmet ndaj qytetarëve tanë në tokën tonë,” thuhet në deklaratën e publikuar nga Departamenti Amerikan i Shtetit.
Sipas deklaratës, shërbimet iraniane të inteligjencës janë përfshirë në veprime të paligjshme që përfshijnë tentativa për vrasje, rrëmbime dhe ngacmime ndaj gazetarëve, disidentëve, qytetarëve hebrenj dhe ish-zyrtarëve në vendet e Evropës dhe Amerikës së Veriut përfshirë edhe Shqipërinë. Më tej theksohet se Irani po bashkëpunon me grupe kriminale ndërkombëtare për të realizuar këto akte.
Ky reagim i fortë vjen vetëm pak vite pas ndërprerjes së marrëdhënieve diplomatike mes Tiranës dhe Teheranit, pasi autoritetet shqiptare zbuluan përfshirjen e Iranit në një sulm kibernetik ndaj infrastrukturës shtetërore shqiptare në vitin 2022. Po atë vit, Shqipëria dëboi të gjithë stafin diplomatik iranian nga vendi.
“Veprime të tilla janë shkelje të qarta të sovranitetit tonë dhe janë të papranueshme. I bëjmë thirrje autoriteteve iraniane të ndalojnë menjëherë çdo aktivitet të paligjshëm në territorin tonë,” thuhet në deklaratë.
Shqipëria, e cila prej vitesh strehon anëtarë të opozitës iraniane në mërgim, është shpesh në qendër të interesit të shërbimeve iraniane, çka e bën këtë deklaratë një sinjal të qartë për unitetin dhe vendosmërinë e vendeve perëndimore për të mbrojtur sovranitetin dhe qytetarët e tyre.
