Shqipëria ka shënuar një tjetër hap të rëndësishëm në rrugën e forcimit të institucioneve të drejtësisë dhe përafrimit me standardet evropiane, duke u anëtarësuar në European Council of Legal Forensic Medicine (ECLFM), organi më i lartë evropian në fushën e mjekësisë ligjore.
Ministri i Drejtësisë, Toni Gogu, e cilësoi këtë si një arritje me rëndësi strategjike, e cila forcon pozicionin e Shqipërisë në komunitetin evropian të mjekësisë ligjore dhe krijon mundësi të reja për zhvillim profesional, shkencor dhe institucional.
Në një postim në rrjetin social ministri Gogu theksoi se anëtarësimi në ECLFM i mundëson Shqipërisë të përfaqësohet zyrtarisht në organin më të lartë evropian të mjekësisë ligjore, të kontribuojë në hartimin e standardeve evropiane për autopsitë, hetimin e vendit të ngjarjes dhe ekspertizat mjekoligjore, si edhe të marrë pjesë në projekte shkencore dhe grupe ndërkombëtare pune.
“Shqipëria tashmë ka zërin e saj në organin më të lartë evropian të mjekësisë ligjore.
Anëtarësimi në ECLFM forcon pozicionin e vendit tonë në komunitetin evropian të mjekësisë ligjore dhe hap mundësi të reja për zhvillim profesional e shkencor.
Shqipërisë i mundësohet:
të përfaqësohet zyrtarisht në organin më të lartë evropian të mjekësisë ligjore;
të kontribuojë në hartimin e standardeve evropiane për autopsitë, hetimin e vendit të ngjarjes dhe ekspertizat mjekoligjore;
të marrë pjesë në projekte shkencore dhe grupe ndërkombëtare pune;
të forcojë bashkëpunimin me institucionet homologe evropiane;
të përmirësojë trajnimin dhe kualifikimin e specialistëve shqiptarë;
të rrisë besueshmërinë dhe njohjen ndërkombëtare të Institutit të Mjekësisë Ligjore.
Një arritje që e afron Shqipërinë me standardet më të mira evropiane dhe fuqizon cilësinë e ekspertizës mjekoligjore në shërbim të drejtësisë”, shkruan ministri.
