Abuzimi me antibiotikët ka vendosur në alarm gjithë botën për rritjen e rezistencës së mikrobeve ndërkohë që edhe Shqipëria klasifikohet si vend me mbi përdorim të lartë të antibiotikëve duke bërë që shumë infeksione bakteriale të bëhen të vështira në trajtim.
“Sot një mjek është në vështirësi se çfarë antibiotiku duhet të përdor për trajtimin e një infeksioni bakterial. Sipas Institutit të Statistikave përdorimi i antibiotikëve sidomos në këto 4-5 vitet e fundit kemi pasur një trend rritje”, u shpreh Edmond Puca, mjek infeksionist , QSUT.
Si pasojë e rezistencës antimikrobike vendi ynë bazuar në të dhëna zyrtare është përballur me vdekje dhe ditë qëndrim më të lartë në spitale
“Dimë që të paktën 300 pacientë në vit vdesin vetëm nga antibiotik rezistenca në Shqipëri dhe më shumë se sa 1000 pacient vdesin dhe nga mbivendosja e antibiotik rezistenca sepse kanë dhe faktor të tjerë shoqërues”, tha Aurora Dollenberg, mjeke.
Fajtor për këtë situatë jemi të gjithë thonë mjekët. Si mjekët ashtu edhe qytetarët që I përdorin ato pa rekomandim kudo.
“Ne kemi raste siç është gripi, ku një pjesë e mirë jo vetëm e mjekëve por edhe e familjarëve që shkojnë e marrin vet në farmaci përdorimin e antibiotikëve”, theksoi mjeku.
“Të rritur abuzojnë me antibiotikët dhe nuk e kanë formimin që, nuk shkohet në farmaci të blihet një antibiotik sikur të jenë vitamina”, tha mjekja.
Infeksionet e traktit urinar, pneumonitë bakteriale, infeksionet e gjakut sepsa, infeksionet spitalore , ato seksualisht të transmetueshme dhe turbekulozi, janë ato më të shpeshta që shfaqin rezistencë. Trajtimi i tyre i kthyer tashmë në sfidë u bë tema qendrore e kongresit të 27 evropian me mjeke dhe studiues nga vende të ndryshme të Evropës.
