Komentet e djeshme, për grupin e eleminatoreve në Kampionatin Botëror të vitit 2018 në Rusi, kanë qenë të fokusuara më së shumti në faktin se kombëtares shqiptare i kishte rënë të luante me dy gjigandë të futbollit botëror, si Italia dhe Spanja. Aspekti spektakolar që përfaqësojnë ndeshjet me këto dy përfaqësuese me famë, duket sikur i la në hije komentet për pjesën tjetër të skuadrave të grupit. Me të cilat, sipas të gjitha gjasave, do të konkurojmë realisht, nga momenti që Italia dhe Spanja duken të pamundura për ne. Ashtu siç u shpreh dje edhe presidenti i FSHF Armando Duka.
Ndër ndeshjet me ekipet e treta të grupit, spikat ajo me fqinjin tonë lindor, Maqedoninë. Për shumë arsye, të cilat dihen, mund të ndodhemi para një ndeshjeje me temperaturë të lartë nacionaliste e patriotike. Komuniteti i madh shqiptar në Maqedoni dhe marrëdhëniet plot dirtë-hije mes Tiranës dhe Shkupit, janë faktorë që mund t’i japin kësaj sfide vajtje-ardhje, formën e një “Shqipëri-Serbie” të dytë. Urojmë që kjo të vërtetohet vetëm në aspektin sportiv, pa implikime të tjera, si ato të dhjetorit 2014, në stadiumin e Partizanit në Beograd.
