Nga Bledi Mane/
1./
Lajmi i fundit: Policia asgjesoi 3499 rrënjë canabis sativa në Dukagjin.
Lajmi i parafundit: Policia asgjesoi 3498 rrënjë canabis sativa në Konispol.
Lajm për nesër: Policia aksion frontal në fshatrat e Librazhdit. Sa të gdhijë dita e re do të asgjesohen 3497 rrënjë canabis.
Lajm për javën tjetër: Njoftohen kultivuesit e fshatrave Selckë, Trebickë, Qinam, Radovickë se policia e qarkut Korçë do të vijë aty dhe do ua djegë 3496 rrënjët e mbjella në mënyrë ilegale.
Njoftim i zëdhënësit të Drejtorisë së Përgjithshme të Policisë së Shtetit: Kultivuesit e fshatrave të rrethit Tepelenë janë të lutur të ndërpresin pushimet e tyre në Ksamil dhe të kthehen urgjent pranë parcelave të mbjella me hashash. Pritet të bëhet asgjesimi në terren në prani të poseduesve sepse pastaj fillojnë dalin fjalë sikur policia djeg vetëm 30 rrënjë sa për kronika lajmesh…
2./
Çdo fshat ka një kryeplak. Çdo komunë ka një administrator të ri fringo. Çdo bashki një kryetar dhe çdo rreth banimi ka një ose më shumë deputet në varësi të numurit të popullsisë.
Kryeplaku, administratori, kryebashkiaku janë pa forcë e pa pushtet përballë deputetit. Deputeti është ligjbërës, ligjvënës, qokaxhi, hallezgjidhës, shef policie, krytar gjykate, drejtor spitali, shofer dogane, rroje shkolle, mësues, sanitar halesh, publike, imam xhamie, murg manastiri, piskopat kishe, drejtor banke, dallaveraxhi, baba teqeje, psikolog, guru, jaran, qirës me dhe pa pagesë.
Është qeverisës apo opozitar pak rëndësi ka. Deputetët e zonave tona elektorale veçanërsiht ata të provincave jashtë Tiranës janë institucion i mirëorganizuar dhe amalgamat e tyre ua kalojnë edhe skenarëve të frikshëm shkruar nga Agatha Christie apo Ian Fleming. Deputetët tanë futen në çdo shtëpi dhe fis. Futen në çdo krevat dhe biznes, në çdo dej rrobi e në çdo qelizë komunitare. Këta deputetë që dinë me detaje dashnoret dhe dashnorët e elektoratit të tyre, këta deputetë që emërojnë e shkarkojnë edhe puntorët hallexhinj të rruga-urrës, këta mysybetër që sekserojnë çdo tender dhe fusin hundët në çdo rubinet uji të familjeve hallexhinjësh kanë përgjegjësinë ligjore dhe qytetare për të treguar kush e ka droguar këtë Shqipëri të gjorë sa majtas-djathtas, sa veri e sa jug. Këta deputetë që dinë me detaje sa më vjen fatura e energjisë elektrike, këta deputetë që mbajnë me para të pista hafijet dhe sejmenët e tyre dinë me detaje se kush janë mbjellësit e se kujt i përket parcela e hashashit pa autor. Lerini kryepleqtë e shkretë në fukarrallëkun e tyre se nuk kanë as këllqe fizike e as ligjore të spiunojnë djalin e komshiut pse mbjell hashash te pylli i fshatit. Merruni me deputetët sepse ata dinë gjithçka.
Shkurtouani këmbët këtyre deputetëve që flenë më bythë në parlamentin e dremitur sepse kujtojnë se paratë e fituara nga droga këto dy vitet e ardhshme do i ndihmojnë për zgjedhjet e 2017-s.
Merrni masa urgjente se është çoroditur mileti. Merrni masa se përndryshe do shkoj edhe unë në fshatin tim në Frashër e do mbjell pa frikë hashash. Ndryshe nga këta vemjet drogëmbjellës të deputetëve, unë do blej edhe kasën fiskale e do e shesh hashashin me kupon tatimor. Do e prish muhabetin me Sajmir Tahirin por me Çimin e financave do e kem grurë fare!
