Shqipëria ka një media pjesërisht të lirë. Kjo është ajo që bëhet e ditur nga raporti vjetor i Freedom House publikuar sot ku vendi ynë është renditur në vendin e 97, thuajse në të njëjtat pozita si një vit më parë.
Në raportin e këtij viti Shqipëria cilësohet sërish si një vend me median pjesërisht të lirë. Po e njëjta situatë paraqitet edhe me kosovën, e cila renditet në vendin e 100-të duke shënuar një zbritje në renditje.
Në raportin e vitit 2014-të të Freedom House, Kosova dhe Shqipëria renditeshin në vendin e 98-të. Ky klasifikim konfirmon edhe një herë se liria e mediave në vendin tonë eshtë e vogël. Në krye të listës për lirinë më të madhe të mediave radhiten Norvegjia, Suedia dhe Belgjika.
Në një intervistë me Zërin e Amerikës, Elen Aghekyan analiste në këtë organizatë vëren disa probleme në Shqipëri, ku sipas saj më i madhi është se bizneset e mëdha kontrollojnë tregun e medias.
Po ashtu sipas analistes, problem mbetet në vendin tonë edhe mos zbatimi i ligjeve si ai i lirisë për informim.
“Shumë nga ligjet në Shqipëri përputhen me standardet e mira evropiane, por zakonisht ajo që mungon është zbatimi. Mungojnë aftësitë strukturore për zbatimin e ligjeve të tilla, si ai për lirinë e informimit. Problemi i vërtetë është te sistemi juridik, i cili nuk është i fortë sa duhet. Bizneset e mëdha kontrollojnë tregun e medias, i cili është shumë i vogël. Shumë nga institucionet e medias janë ende mjaft të reja dhe pa aftësi të forta pavarësie.” tha ajo
Aghakyan thotë se përqendrimi i mediave në duart e biznesit në Shqipëri është është një problem mjaft i madh. Për të zgjidhur këtë duhen ligje të forta dhe me masa të forta zbatuese, kundër përqendrimit.
“Kërkohen gjithashtu ligje transparence që publiku të dijë se kush është pronari i këtij apo atij mediumi, apo kush ka aksione në një kompani që është pronare e një mjeti të caktuar informimi. Janë të paktë vendet që kanë patur sukses në këtë aspekt, por kjo është diçka absolutisht e rëndësishme.” u shpreh analistja
Sipas Aghakyan edhe Kosova ka pasur pothuajse të njëjtat probleme gjatë vitit të kaluar. Gjatë këtij viti ajo ka qëndruar në të njëjtat parametra. Kosova, thotë ekspertja, ka probleme që lidhen me mangësitë e sistemit juridik:
“Shikojmë gjithashtu mungesën e një shoqërie të fortë civile, që është me rëndësi kyçe për mbështetjen e lirisë së shtypit.” tha Aghakyan
Sipas saj, Kosova, si shtet i ri, duket se është në rrugë të mbarë, por i duhet dhënë kohë për t’i zhvilluar këto gjëra.
Redaksia Online
(JavaNews.al)
