Shqipëri-Armeni, Rama: Kush është kuqezi i vërtetë Kombëtaren e do njësoj
Kryeministri i Shqipërisë Edi Rama, kujton edhe njëherë shansin e fundit që ka Kombëtarja shqiptare për t’u kualifikuar në Euro 2016. Në profilin e tij në rrjetin social “Facebook” Rama shkruan, se “ekipin shqiptar e pret sprova e fundit në grup, që është ndeshja me Armeninë.
Rama shkruan: “Është e (para)fundit sepse është e fundit në grup, për të shkuar direkt në Francë me një fitore dhe, në rast barazimi ose humbjeje, është e parafundit sepse Shqipërinë e pret sprova finale në playoff me të tretën e një grupi tjetër. Dhe pas dy humbjeve të minutave të fundit, të dielën në 18.00, është koha për të qenë përsëri së bashku me Kuqezinjtë në Parkun e Kryeministrisë në përpjekjen e vështirë po aspak të pamundur, të kualifikimit direkt në Finalet e Europianit”.
Në fund të postimit të tij, kryeministri shkruan: “Kush ka shfryrë fjalë të tepërta zemërimi ndaj Kombëtares pas ndeshjes së mbrëmshme nuk është i ftuar! Kush është kuqezi i vërtetë Kombëtaren e do njësoj kur fiton e kur humbet, dhe mund të zemërohet me të vetëm kur kuqezinjtë nuk japin gjithçka nga vetja në fushën e lojës. Por kjo deri tani nuk ka ndodhur kurrë me këtë Kombëtare, e cila shkon apo nuk shkon në Francë, është ngjitur në majën e historisë së futbollit shqiptar. #ForcaShqipëria”.
