Banorët e qytetit të Gramshit, të mbështetur edhe nga Partia Demokratike, kanë protestuar sot për pronat e tyre dhe mos dhënien e dëmshpërblimeve nga ana e qeverisë pas ndërtimit të kaskadës së Devollit.
Ata janë shprehur se, ndihen të braktisur nga mungesa e rrugës dhe investimeve dhe të grabitur nga qeveria.
Kryetari i Partisë Demokratike të Gramshit, Elmaz Haruni tha se qytetarët janë në të drejtën e tyre dhe cështja e tyre duhet të zgjidhet. PD do të jetë në krah të qytetarëve.
“Sot jemi me qytetarët në protestë e cila nuk do të jetë e para dhe as e fundit derisa të marrin fund abuzimet me rrugën në Elbasan, derisa banorët të shpronësohen me vlerën aktuale të tregut, të gjithë, pronarët dhe fermerët që u dëmtuan nga kaskada e Devollit” tha Haruni.
Sekretari i Partisë Demokratike për Aksionin Qytetar, Ervin Salianji, tha se protestat e qytetarëve në të gjithë vendin janë shenjë e ndërgjegjësimit, janë rruga e zgjidhjes së problemeve.
“Ju siguroj edhe njëherë, dhe nëse sot jemi 1 mijë apo 2 mijë, 5 mijë do jemi nesër 50 mijë do jenë para qeverisë, 100 mijë, gjithë qytetarët e bashkuar do jenë një ditë më pas derisa të drejtat legjitime të qytetarëve të respektohen. Shqipëria është në këmbë, Shqipëria nuk mund ta mbajë këtë zgjedhë që i ka vendosur kjo qeveri për ta sunduar dhe jo qeverisur”, tha Salianji.
