Pas debateve të shumta që nisën që në ditën e djeshme në lidhje me kriminalizimin e shpifjes, Qeveria ka vendosur që të tërheqë projekligjin e saj për të riformuluar edhe njëherë nenet e saj, në mënyrë që të mos krijohet asnjë lloj paqartësie. Gjithçka ka nisur me ndjesën publike që ka bërë Kryeministri Edi Rama në faqen e tij zyrtare në rrjetin social Facebook ku ka shkruar:
“Edhe neni përkates duhet të reflektoje këtë qëllim që e kam shprehur publikisht me kohë. Ndjesë që ka hapur shteg për një keqkuptim të madh!”- shkruante kryeministri, pas një postimi të disa minutave më para në Twitter, ku saktësonte se kriminalizimi shpifjes kishte të bënte vetëm me politikanët dhe jo me median.
Më pas, përmes Transparenca.al qeveria ka dhënë lajmin se do të rifomulojë ligjin. Njëkohësisht i është përgjigjur dhe akuzave të bëra nga PD në lidhje me draftin në fjalë.
Më poshtë postimi i plotë i Transparenca. al:
“Në të kundërt nga ajo çfarë pretendon Partia Demokratike, ashtu edhe siç Kryeministri ka pohuar, është kërkuar vetëm kriminalizimi me ligj i shpifjes për shkak të detyrës, për çdo rast kur akuzat e bëra nga një përfaqësues i zgjedhur i popullit ose i një partie politike parlamentare janë akuza penalisht shqetësuese për opinionin publik. Duke qenë se formulimi i projektligjit linte mesa duket hapësirë për të keqinterpretuar dhe përfshirë edhe median në objektin e vet, projektligji është tërhequr për t’u riformuluar në mënyrë që të mos krijohet asnjë lloj paqartësie.
Arsyen dhe objektin e kërkesës për të kriminalizuar shpifjen për shkak të detyrës të përfaqësuesve të zgjedhur të popullit, ose partive politike parlamentare, Kryeministri Rama e ka shprehur qartësisht në fjalën e tij në seancën parlamentare të datës 12 shkurt 2015.
Më poshtë, mund të lexoni transkriptin e kësaj fjale: “Ne do të kërkojmë kriminalizimin një orë e më parë me ligj të shpifjes për shkak të detyrës për çdo rast kur akuzat e bëra nga një përfaqësues i zgjedhur i popullit ose i një partie politike parlamentare janë akuza penalisht shqetësuese për opinionin publik.”- thuhet në reagimin e qeverisë.
