E kanë ngjyer e përngjyer. Kanë vendosur firma, por tashti Fisnik Ismaili dhe askush tjetër nuk do të mund të marrin më iniciativa krye më vete për ngjyrosjen e obeliskut NEWBORN.
Tani e tutje, për çdo ndërhyje në obeliskun që prej 17 shkurtit të 2008-s zë vend para Pallatit të Rinisë në Prishtinë, duhet të merret leje nga Ministria e Kulturës, Rinisë dhe Sportit. Krejt kjo pasi obelisku i zbuluar në Ditën e Shpalljes së Pavarësisë së Kosovës tashmë është monument të cilin e mbron shteti, shkruan “Koha Ditore”.
NEWBORN-i është përfshirë në Listën e trashëgimisë kulturore për mbrojtje të përkohshme. Ka statusin e të gjitha pasurive, shkatërrimi dhe heqja e të cilave, sipas Ligjit për trashëgimi kulturore, dënohet prej 1 mijë deri në 500 mijë euro, e me Kod Penal cilësohet si vepër penale.
