Nga Mero Baze/
Ka pasur një shpërthim të pakuptimtë për shumë vetë nga Sali Berisha, ndaj rrjedhës që ka marrë dje në mbrëmje një emision televiziv, ku ka qenë pjesmarrës avokati i tij dhe klientëve të familjes së tij. Berisha ka shpërthyer ndaj gazetarit Artan Hoxha në panel dhe ndaj disa gazetarëve të tjerë që nuk ishin aty. I ka akuzuar se ata kanë devijuar debatin dhe kanë bërë analogji mes standardit që përdorën demokratët ndaj prokurores Ymeraj në rastin “Tahiri” dhe në rastin e dosjes së rrugës “Elbasan- Tiranë”. Biles Artan Hoxhën e ka akuzuar dhe si dëshmitar i vrasjes së një qytetari, edhe pse ai është në fakt, i vetmi njeri që ka provuar me dëshmi filmike, vrasjen nga Berisha të katër qytetarëve më 21 janar.
Realisht, shpërthimi nuk pasqyron ndonjë urrejtje të Berishës për këta gazetarë. Edhe pse gjuha e tij është tejet agresve, jashtë çdo kufiri, ai nuk e ka personalisht me ta, por me lehtësinë e padurueshem për të, se si po avancojnë kaq shpejt gjërat, që Prokuroria dhe gjykatat, pastaj dhe shtypi, të flasë normalisht për arrestime të rrethit të tij familjar, pa asnjë drojë.
Në studio ishte Neshat Fana, avokati personal i tij, të cilit ai i ka besuar të mbrojë mikun e vajzës së tij, që është në telashe, Andi Tomën. Ajo që atë e ka tronditur seriozisht, është se gjithçka u bë natyrshëm dhe askush nuk e vrau mendjen që Andi Toma ishte një “vijë e kuqe” për drejtësinë deri para pak kohësh. Dhe e përfytyroj çfarë ka ndodhur. Ai pasi e ka instruktuar gjatë Neshat Fanën çfarë të thoshte, i ka çuar mesazhe në studio, se “i ka ngul thikë pas shpine” PD-së me heshtjen e tij dhe ai si gjithë të dërguarit e tij nëpër studio, ja ka hedh fajin gazetarëve, se kanë devijuar bisedën. Dhe kjo është arsyeja e parë e shpërthimit të tij.
Por krye-arsyeja mbetet frika që ka nga analogjitë, dhe sidomos analogjitë me Saimir Tahirin.
Sali Berisha ka një problem të madh me analogjinë që bëhet me rastin “Tahiri” në një anë, dhe rastin Shkëlzen Berisha në anën tjetër. Saimir Tahiri është nën akuzë, pasi dy trafikantë e kanë përgojuar si mbrojtës të tyre dhe deri më sot, kemi vetëm regjistrimet e bisedës së tyre, për të cilat Tahiri thotë se është fantazi e tyre.
Në analogji me këtë rast, Shkëlzen Berisha është i përfolur në një email zyrtar të drejtorit të CEZ, si lobues i një praktike nga e cila CEZ do të fitonte miliona euro në kurriz të buxhetit të shtetit shqiptar. Sipas email-it, i biri i kryeministrit, u kishte rregulluar atyre takimin me kryeministrin, dhe pas takimit ata do takonin dhe të birin.
Ndryshe nga rasti “Tahiri”, këtu vepra u konsumua. Sipas asaj që thotë email-et, zyrtarët e CEZ erdhën në Tiranë, provohet që i priti Sali Berisha, dhe më vonë në vazhdim, provohet se qeveria i bëri ndryshimet ligjore që mundësuan lehtësimin e një borxhi rreth 60 milionë dollarë të CEZ.
Shkëlzeni është aq i trembur nga kjo gjë, sa dje ka spekuluar publikisht në një intervistë në TV Klan, ku thotë se emaili në fjalë ka ardhur një vit pasi është bërë privatizimi dhe gazetari ka tundur kokën i kënaqur. Askush nuk e ka akuzuar se email-i ka lidhje me privatizimin, por me lobimin për përfitime të kompanisë së privatizuar në kurriz të buxhetit të shtetit. Akuza se ka ndihmuar në privatizim është tjetër, dhe lidhet me Nue Kalaj, tërhqjen cash të 7 milionë eurove një javë para zgjedhjeve, dhe jo me email-et e CEZ.
Është tipike, një nga ato gjëra që bën dhe Berisha, kur ti e akuzon për gjë tjetër, dhe ai përgjigjet për gjë tjetër.
Pra, nëse shkojmë me këtë analogji dhe nëse përdorim të njëjtin standard si për Saimir Tahirin, dhe Shkëlzenin, ky i fundit e ka të provuar lobimin kriminal në kurriz të taksave të shqiptarëve dhe përfitimin nga firma në dorë të babait. Dy ish- kryeministrat e fundit grek po shkojnë drejt burgut për dy kontrata ilaçesh të Novartis, dhe jo më për gjëra të tilla.
Është kjo arsyeja që Berishën e shqetëson çdo analogji që bëhet mes Tahirit dhe Shkëlzenit, dhe çdo përpjekje për të krahasuar qëndrimin e prokurores së Tahirit me qëndrimin që po mban ndaj dosjes së re që ka në dorë.
Shpërthimi i Berishës, edhe pse dukej ndaj gazetarëve, ishte ndaj debatit publik në tërësi. Ai nuk po e duron dot, që shqiptarët janë shumë të qetë kur dëgjojnë analogjitë që duhet të çojnë para drejtësisë familjen e tij. Nuk e kupton dot që drejtësia ka vrarë frikën dhe po guxon t’i afrohet derës së shtëpisë së tij. Është dita që nuk ka besuar se do vinte kurrë! Dhe tani po u çon fjalë gazetarëve të mos ta thyejnë këtë tabu dhe ta trajtojnë si çdo njeri të prekshëm. I duhet ende hija e rëndë e njeriut që nuk e prekin dot. Nuk e ka keq!
Por ata që ka afër, duhet ta këshillojnë që të duket burrë i rendë, duhet ta mbajë veten. Të paktën të mos flasë e shkruajë si kjo sot, se duket që, ose është çmendur, ose është i dhjerë! Dhe kushdo që të shikon në këtë gjendje, ashtu të trajton.
