“Raketa Starship e SpaceX shpërthen menjëherë pas lëshimit”. “Starship më në fund niset, por shpërthen pas ngritjes.” “Raketa Starship e Elon Musk shpërthen disa minuta pas nisjes”…
Këto janë vetëm disa nga titujt e mediave më të mëdha në botë: New York Times, BBC, Guardian, CNBC, New York Post. Thuajse në të gjithë titujt duket se kryefjala është dështimi.
“Raketa gjigante u lëshua me sukses nga Teksasi, por shpërtheu disa minuta më vonë kur ndarja e shtytësit dështoi”, shkroi BBC.
Megjithatë, nga ana tjetër, SpaceX dhe miliarderi Elon Musk duken të lumtur dhe të kënaqur me rezultatin e lëshimit të sotëm dhe gjatë videos njerëzit mund të dëgjohen duke brohoritur dhe duartrokitur.
Në video shihet edhe Elon Musk, i cili nuk duket se ka asnjë gjurmë shqetësimi. Shpërthimi i raketës nuk është dështim, sipas kompanisë së miliarderit. Kjo pasi, fakti që anija kozmike në fjalë, që është më e madhja e ndërtuar ndonjëherë, arriti të lëshohej nga baza, është cilësuar si një sukses shumë i madh.
Megjithatë, shkaku i shpërthimit nuk dihet ende.
“Sikur fluturimi testues të mos ishte mjaftueshëm emocionues, Starship iu nënshtrua një çmontimi të shpejtë të paplanifikuar përpara ndarjes”, shkroi SpaceX në Twitter.
Po ashtu, në postim thuhet se me një test të tillë, suksesi vjen nga ato që mësohen që do ta ndihmojnë ekipin që të përmirësojnë raketat e ardhshme.
Elon Musk, pasi uroi ekipet e kompanisë së tij për punën, premtoi realizmin e një tjetër prove në muajt në vijim.
