Shpërthimi i ciklosporozës në Shtetet e Bashkuara që transmetohet përmes konsumit të ushqimeve ose ujit të kontaminuar me lëndë fekale, ka vënë në alarm autoritetet shëndetësore, ndërsa hetimet për burimin e infeksionit vijojnë.
Deri tani janë konfirmuar mbi 1,600 raste në 34 shtete amerikane, ndërsa qindra kanë pasur nevojë për trajtim spitalor.
Mjekët shpjegojnë se infeksioni nuk transmetohet nga njeriu te njeriu, por lidhet kryesisht me konsumimin e sallatave, zarzavateve apo frutave të pagatuara të kontaminuara gjatë prodhimit ose përpunimit.
“Bëhet fjalë për një parazit që e njohim mirë dhe që nuk transmetohet nga njeriu te njeriu. Infeksioni merret përmes ushqimeve ose ujit të kontaminuar me lëndë fekale, më shpesh nga produkte që konsumohen të pagatuara, si sallatat, zarzavatet apo disa lloje frutash të cilat mund të jenë larë ose ujitur me ujë të ndotur.” – u shpreh Ilir Alimehmeti, epidemiolog.
Periudha e inkubacionit varion nga dy ditë deri në rreth një javë dhe shfaqja e simptomave shoqërohet me diarre shpesh të rëndë dhe dhimbje barku. Hetimi epidemiologjik bëhet i vështirë.
“Simptomat nuk janë specifike vetëm për këtë infeksion, por më të shpeshtat janë diarreja, dhimbjet e barkut, të përzierat dhe lodhja. Tek shumica e pacientëve ato zgjasin vetëm disa ditë, por mund të vazhdojnë edhe disa javë, madje edhe më shumë se një muaj. Ka raste që kërkojnë hospitalizim. Për këtë ka mjekim. Nuk ekziston një vaksinë kundër këtij infeksioni.”
Interesimit të RTSH në lidhje me rastet prezente në Shqipëri, ISHP u përgjigj se nuk ka asnjë rast të raportuar dhe se instituti ka kapacitetet për diagnostikim të këtij infeksioni, ndërsa sistemi i survejancës monitoron vazhdimisht infeksionet përmes ushqimit dhe ujit.
Specialistët theksojnë se masa më e rëndësishme parandaluese mbetet larja e kujdesshme e frutave dhe perimeve, përdorimi i ujit të sigurt dhe respektimi i rregullave të higjienës gjatë përgatitjes së ushqimit, për të ulur rrezikun e transmetimit.
