Disa shpërthime janë dëgjuar në një objekt magazinimi municionesh në Bullgari, pasi një kamion që transportonte materiale për një uzinë ushtarake mori flakë, raportojnë mediat lokale.
Incidenti ndodhi rreth mesditës të së hënës pranë fshatit Belitsa, në provincën e Gabrovës, sipas agjencisë së lajmeve BGNES, e cila publikoi pamje ku shihet një re e madhe e bardhë që ngrihet në distancë, e shoqëruar nga shpërthime të forta.
Nuk raportohet për viktima. Paraprakisht dyshohet për një ngjarje aksidentale. Objekti u rrethua nga autoritetet dhe rreth 300 punonjës të kompanisë bullgare të prodhimit të armëve EMCO u evakuuan, ndërsa banorëve të zonave përreth iu këshillua të qëndronin brenda banesave.
EMCO është një nga prodhuesit kryesorë të municioneve në Bullgari.
