Ukraina lëshoi një alarm ajror mbarëkombëtar këtë mëngjes pasi ushtria paralajmëroi se një grup bombarduesish u ngritën nga një bazë ruse.
Kryetari i bashkisë së Kievit, Vitali Klitschko, foli për shpërthime në qytet dhe u bëri thirrje banorëve të qëndrojnë në strehimore.
Dëshmitarët raportuan disa shpërthime në pjesë të ndryshme të Kievit.
Edhe kryetari i bashkisë së Lviv, Andriy Sadovy, raportoi shpërthime në qytetin perëndimor pranë kufirit të Ukrainës me Poloninë.
Gjatë natës një person humbi jetën në një sulm me raketa ruse në Chuhuiv, në rajonin lindor të Ukrainës, Kharkiv. Kryebashkiakja Halyna Minaeva tha se një raketë goditi një zonë të banuar të qytetit.
Një sulm me dron nga forcat e Kievit shkaktoi një zjarr në një depo nafte në rajonin Kursk të Rusisë, në kufi me Ukrainën. Kjo u njoftua nga autoritetet e Moskës, të cituar nga agjencia Tass. “Pas një sulmi nga një dron ukrainas, një zjarr shpërtheu në një depo nafte në rajonin e Kursk. Sipas informacioneve fillestare, nuk kishte viktima,” tha guvernatori Roman Starovoit në Telegram.
/a.r
