Një shpërthim në një fabrikë fishekzjarresh në provincën Hunan të Kinës ka vrarë 21 persona dhe ka lënë 61 të plagosur.
Shpërthimi ndodhi në fabrikën Huasheng Fireworks rreth orës 16:40 (sipas kohës lokale) të hënën, në qytetin Liuyang, duke detyruar ekipet e shpëtimit të evakuojnë të gjithë banorët brenda një rrezeje prej 3 km nga fabrika.
Policia, e cila po heton shkaqet e shpërthimit, ka marrë “masa kontrolli” ndaj personit përgjegjës të kompanisë së fishekzjarreve, raportuan mediat shtetërore kineze.
Autoritetet thanë se dy depo baruti brenda zonës së fabrikës paraqisnin rrezik të lartë gjatë operacioneve të shpëtimit.
Ekipet e shpëtimit u detyruan të evakuojnë të gjithë personat brenda rrezes 3 km nga fabrika. Ata gjithashtu zbatuan masa si lagështimi i zonës për të “parandaluar aksidente dytësore gjatë operacionit të shpëtimit”.
Ndikimi i shpërthimit ishte aq i fortë sa edhe dritaret e një ndërtese banimi pranë fabrikës u thyen.
BBC shkruan se të plagosurit janë të moshave nga të 20-at deri në të 60-at, dhe disa prej tyre pësuan dëmtime në kocka pasi u goditën nga mbeturinat që fluturuan në ajër.
Presidenti Xi Jinping ka bërë thirrje për përpjekje maksimale për të gjetur personat që ende mungojnë dhe për të shpëtuar të plagosurit. Ai gjithashtu kërkoi një hetim për aksidentin për të mbajtur përgjegjës ata që janë fajtorë, raportuan mediat shtetërore.
Një banore që jeton rreth 1 km larg fabrikës i tha Beijing News se banorët tani duhet të bëjnë devijime pasi gurë janë hedhur në rrugë nga shpërthimi.
“Xhamat e dritareve në shtëpitë tona u thyen, kornizat e aluminit u deformuan dhe madje edhe dyert prej çeliku inox u shtrembëruan,” tha ajo. Një tjetër banore tha për mediat se është larguar nga fshati nga frika.
Qyteti Liuyang është i njohur për prodhimin e fishekzjarreve dhe konsiderohet si prodhuesi më i madh në botë në këtë sektor.
Shpërthimet në fabrika dhe dyqane fishekzjarresh nuk janë të rralla në Kinë dhe shpesh janë fatale. Në shkurt, 12 persona humbën jetën në një shpërthim në një dyqan fishekzjarresh në provincën Hubei.
