Një zjarr masiv përfshiu një njësi industrialenë Essex të Anglisë dhe shkaktoi një shpërthim të fuqishëm, i cili u dëgjua dhe u ndje në zona të largëta. Mbi 100 zjarrfikës u angazhuan për të vënë nën kontroll flakët që shpërthyen pranë fshatit Rettendon, në jug të Chelmsford.
Shpërthimi u shkaktua nga prania e një sasie plehu kimik të ruajtur në një nga ndërtesat e përfshira nga zjarri. Pamjet nga vendngjarja treguan një top të madh zjarri që ngrihej në ajër, ndërsa dëshmitarët e përshkruan zhurmën si “si një bombë” ose si një shpërthim zanor.
Zjarri shkaktoi dëme të mëdha në disa ndërtesa dhe automjete në zonën industriale dhe vijoi të digjej edhe gjatë së shtunës. Shërbimet e emergjencës thanë se nuk kishte rrezik të mëtejshëm për publikun, ndërsa banorëve pranë zonës iu kërkua të mbanin dritaret të mbyllura për shkak të tymit të dendur.
Shefi i Shërbimit të Zjarrfikësve dhe Shpëtimit në Essex, Dave Bond, tha se shpërthimi i plehut kimik ishte arsyeja që autoritetet shpallën incidentin madhor. Ai konfirmoi se të gjithë personat që ndodheshin në zonën e ndërhyrjes ishin të sigurt, ndërsa disa banorë ishin evakuuar për masa parandaluese.
Dëshmitarët treguan momente paniku, duke thënë se shpërthimi shkundi ndërtesat dhe dërgoi copa metalike në ajër. Disa prej tyre raportuan se mbeturinat nga shpërthimi ranë në fusha përreth dhe shkaktuan vatra të vogla zjarri.
Autoritetet kanë nisur hetimet për të përcaktuar shkakun e zjarrit. Të shtunën në mëngjes ndërhyrja u reduktua, me rreth 25 zjarrfikës që vijonin punën në terren së bashku me specialistë për të shuar plotësisht mbetjet e zjarrit.
