Drejtuesi i emisionit “Të paekspozuarit” në Ora News, njëkohësisht dhe Drejtori i Përgjithshëm i këtij televizioni, Ylli Rakipi, e ka cilësuar Edi Ramën si kryeministrin më budalla që nga viti 1912. Në një intervistë për televizionin ku ai bën pjesë, ku temë e kronikës ka qenë raporti i Kryeministrit Rama, në lidhje me median dhe aktorët mediatikë në vend, Ylli Rakipi ka thënë se Rama del në media edhe kur shkon në banjo.
“Vendin ku ne jetojmë zoti.Edi Rama po e kthen në një kënetë të madhe. Dhe po të hedhësh rrjetat në këtë kënetë, peshku i madh që kapet është Edi Rama, përfaqësuesi i kësaj kënete. Etika nuk ma lejon të them që Edi Rama është Kryeministri më budalla i shqiptarëve që nga viti 1912. Por them që është deri tani me performancën e vet, me punën e vet, është Kryeministri më i paaftë që nga viti 1912. Të merresh median në një kohë kur ti je personi që nga pika e mëngjesit deri dhe pas orës 24:00, tremb edhe foshnjet e sapolindura, që del në të gjitha mediat, në mënyrë sistematike. Del në media edhe kur shkon në banjo. Është e turpshme.”- ka thënë Ylli Rakipi.
Sipas Ylli Rakipit, Kryeministri Rama është personi më arrogant i të gjithë historisë politike të vendit nisur nga 1912. Kjo deklaratë e drejtuesit të emisionit politik “Të paekspozuarit” erdhi në lidhje me publikimin e progres raportit të KE, si dhe me raportin e pushtetit me medias dhe lirinë e kësaj të fundit në Shqipëri.
“Duhej një vlerësim akoma dhe më i ulët. Nëse progresi përcakton sjelljen jo të mirë të disa prej politikanëve, duhet të themi që në krye të kësaj liste është kryeministri Rama, i cili është Kryeministri më arrogant që nga viti 1912 besoj deri sot me median.”- ka theksuar Rakipi.
