Bordi i Transparencës për caktimin e çmimit të naftës po bën një rrjepje të mëshirshme ndaj qytetarëve shqiptar.
Kështu u shpreh në një deklaratë për mediat kryetari i Partisë së Lirisë, Ilir Meta, i cili u ndal tek çmimi i naftës në bursën ndërkombëtare, ku tha se është më i i ulët se në nivelet e para luftës në Ukrainë.
Meta tha se vetëm në Shqipëri nuk po merren masa për konsumatorët, por merren në funksion të kryeoligarkut.
‘Ulja e çmimit të naftës nuk po reflektohet në vendin tonë. Kudo janë marrë masa vetëm në vendin tonë nuk janë marrë dhe punohet në fuksion të kryeoligarkut. U bë kohë që janë propozuar disa masa për uljen e çmimit të naftës dhe asnjë masë nuk është marrë. Grumbullohen rreth 200 mln euro në vit nga kjo taksë, pro përdoren vetëm 20 mln euro për mirëmbajtje. 200 mln grumbullohen me destinacion mbajtjen e rrugëve, por vetëm 20 mln investohen për mirëmbajtje. Ku shkojnë lekët e tjera, sigurisht shkojnë në kostot e shtuara. Po të shkonin për mirëmbajtje nuk do të ishte kjo gjendje e mjeruar e rrugëve. Jemi këtu për t’i thënë ndal kësaj rrjepje të jashtëzakonshme. Po vidhen në mënyrë mizore të gjithë qytetarët shqiptar për çdo litër.’- tha Meta.
Për kryetarin e Partisë së Lirisë, objektivi kryesor i denoncimeve të tyre është Edi Rama, pasi është kryeoligarku i Shqipërisë, te cilin e kërcënoi se dara do t’i shtrëngohet çdo ditë.
‘Populli do të ngrihet dhe askush të mos shqetësohet për denoncimet dhe konferencat. Do të vazhdojmë çdo ditë, me denoncime me fakte dhe prova. Do të ndërmarrim alternative si kjo e z. Vasilit, por edhe akte për indeksimin e pagave. Objektivi ynë është Edi Rama, ai është kryeoligarku i Shqipërisë, ata të tjerët janë thjesht shërbëtorë të tij. Ora e ligjit po vjen, ora e qytetarëve po vjen. Kjo që po bëjmë është pjesë e punës sonë të vazhdueshme. Dara do t’i shtrëngohet darën çdo ditë.’- tha Meta.
/e.d
