Shpërthen Maks Velos: Jemi vend islamik, ja artistët që më futën në burg
Maks Velo është rikthyer sërish me disa deklarata të forta. Në ceremoninë e hapjes së ekspozitës së tij “Retrospektivë” në Galerinë Kombëtare të Arteve, artisti kontrovers tha se Shqipëria është një vend islamik.
“Nuk është vend ky për të bërë art. Është vend islamik dhe oriental. Është orient. I shef ti ata emigrantët që sulen nga andej? Dinë ata ç’është piktura? Hë? Ta pret mendja ty se dinë ata ç’është piktura? Ja kështu jemi ne!”, tha Velo pas disa pyetjesh nga gazetarët.
Duke mos u ndalur me kaq, Velo kishte diccka edhe për artistët. “Tërë jetën artistët i kam konsideruar si kriminelë. Këtë ekspozitë nuk donin ta çelnin drejtorët e parë. Artistët tanë janë injorantë. Dukuria e madhe është që i marrin këto dhe i kopjojnë”, tha Velo. Ndërkohë që ka lëshuar një silurë edhe ndaj kryeministrit Edi Rama: “E drejta e autorit është vetëm aty te sahati i elektrikut. Vetëm aty i kap Rama për fyti. S’ka të drejtë autori”.
“Po. Dhe kur dola, Kujtim Buza, më tha: Gjallë qënke ti? Unë artistët i kam konsideruar si kriminelë, ai armiq. Ata që më kanë bërë artistët nuk ma ka bërë njeri, para viteve ’90. Por edhe pas viteve ’90 nuk ma dhanë studion. Kur dha urdhër Sali Berisha që të ndaheshin studiot, mua më dhanë një pjesë të studios së Kristaq Ramës. Por si mund të shkoja unë e t’i merrja studion një profesori të nderuar?”, ka thënë Velo.
“E kam thënë disa herë së në sallën gjyqit kishte rreth 40 a 50 artistë. Pse nuk shkruan për gjyqin tim? por unë rezistova, po të mos kisha rezistuar do më bënin leckë. Nuk arrij q ëtë shpjegoj dot se si ligësia të jetë kaq e thellë tek artistët. Policët e Spaçit ishin më të mirë”, vazhdon më tej Maks Velo.
“Më kanë bërë një ekspertizë të turpshme. Foto Stamo, Skënder Milori dhe Kujtim Buza. Unë jetën e kam pasur të vështirë dhe vazhdoj ta kem. Në Dardhë më kanë marrë shtëpinë e babit dhe të gjyshit. Kjo ishte e rëndësishme se kisha mundësi të tregoja vepra. Galeria nuk ka bërë ekspozitë për artistët e burgosur se nuk donin Edi Hila dhe Alush Shima”, rrefen Velo.
Ekspozita e Velos përmban 99 piktura në përmasa të vogla që sipas tij tregojnë rrugën që ai ka ndjekur në jetën e tij para, gjatë dhe pas burgosjes.
