Një ngjarje e rëndë ka ndodhur në Vlorë mëngjesin e sotëm, ku një automjet ka shpërhtyer në lëvizje teksa janë plagosur dy persona. Burime nga Policia e këtij qyteti, bëjnë me dije se ngjarja ka ndodhur herët në mëngjes.
Mjeti ishte në lëvizje në dalje të fshatit të Panajasë në Vlorë, kur ka ndodhur shpërthimi, që e ka nxjerrë autoveturën jashtë trasesë së rrugës. Në makinë ishin dy persona, të cilët kanë mbetur të lënduar rëndë dhe janë dërguar menjëherë për ndihmë mjekësore në spitalin rajonal të Vlorës. Sipas njoftimit, mjeti kishte targa Durrësit, DR 8135 E.
Policia në vendngjarje është duke hetuar shkaqet e këtij shpërthimi. Forcat xheniere ndodhen në vendngjarje, teksa konfidencialisht mësohet se mjeti ishte marrë me qira nga njëri prej të plagosurve.
