Autoritetet në Las Vegas po hetojnë një shpërthim dhe zjarr të një Tesla Cybertruck në hyrje të Trump International Hotel të mërkurën në mëngjes.
Ngjarja u raportua pak pas orës 8:40 të mëngjesit dhe ekipet e emergjencës gjetën një Cybertruck 2024 të përfshirë nga flakët, tha sherifi i Las Vegas-it, Kevin McCahill, në një konferencë për shtyp.
“Ka një person të vdekur brenda Cybertruck-ut dhe nuk e di ende nëse është burrë apo grua,” tha McCahill.
Shtatë viktima të tjera pësuan ato që McCahill i përshkroi si lëndime “të lehta” si pasojë e shpërthimit.
Jeremy Schwartz, agjenti special në detyrë i FBI-së në Las Vegas, konfirmoi gjithashtu gjatë konferencës për shtyp se ekipi i tij po merr pjesë në hetim, duke lënë të hapura të gjitha pistat e hetimit, përfshi edhe terrorizmin.
CNN i ka kërkuar Tesla-s një koment mbi incidentin.
Eric Trump, nënkryetari ekzekutiv i organizatës Trump, shkroi në X se “siguria dhe mirëqenia e mysafirëve dhe stafit tonë mbeten përparësia jonë kryesore.”
“Ne shprehim mirënjohjen tonë të sinqertë ndaj Departamentit të Zjarrfikësve të Las Vegas-it dhe forcave lokale të rendit për përgjigjen e tyre të shpejtë dhe profesionalizmin,” shkroi Trump.
