Policia e Tiranës ka finalizuar operacionin e koduar “Segmenti”, duke goditur një grup të strukturuar kriminal që merrej me shitjen e lëndëve narkotike në zona të ndryshme të Tiranës, kryesisht pranë shkollave 9-vjeçare dhe të mesme.
Në kuadër të operacionit janë ekzekutuar masat e sigurisë “Arrest në burg” për 14 persona dhe “Arrest në shtëpi” për një shtetase, ndërsa 5 të tjerë janë shpallur në kërkim si pjesëtarë të grupit kriminal.
Gjatë operacionit, policia arrestoi në flagrancë edhe një 22-vjeçar, të cilit iu gjet një armë zjarri pistoletë me municion. Po ashtu, u zbuluan ambiente të përshtatura për organizimin e lojërave të paligjshme të fatit.
Në kuadër të operacionit, u ekzekutua masa e sigurisë “Arrest në burg”, caktuar nga Gjykata, për shtetasit G. Gj., 41 vjeç; A. H., 39 vjeç; K. M., 25 vjeç; K. K., 22 vjeç; P. K., 35 vjeç; A. M., 51 vjeç; A. C., 33 vjeç; R. Q., 31 vjeç; R. M., 32 vjeç; E. Sh., 43 vjeç; S. Z., 32 vjeç; A. H., 27 vjeç; A. C., 22 vjeç dhe G. M., 28 vjeç, si dhe masa e sigurisë “Arrest në shtëpi”, për shtetasen F. Gj., 38 vjeçe.
Gjithashtu, u shpallën në kërkim shtetasit: M. Gj., 34 vjeç; O. N., 30 vjeç; E. A., 24 vjeç; E. S., 19 vjeç dhe K. S., 41 vjeç. Vijon puna për lokalizimin dhe kapjen e tyre.
Si rezultat i kontrolleve, u sekuestruan 220 gramë kokainë, qindra doza Cannabis Sativa të gatshme për shitje, një armë zjarri pistoletë, dy tavolina pokeri, fisha dhe çipsa për lojëra fati, si edhe 2.3 milionë lekë të rinj, që dyshohet se janë përfituar nga aktiviteti kriminal.
Sipas njoftimittë policisë, anëtarët e grupit, në bashkëpunim me njëri-tjetrin, shpërndanin lëndë narkotike në zona të ndryshme të kryeqytetit, me fokus të veçantë pranë shkollave 9-vjeçare dhe të mesme.
Policia bën me dije se ky operacion është vazhdim i një hetimi më të gjerë, gjatë të cilit në faza të mëparshme janë arrestuar edhe shtatë persona të tjerë dhe janë sekuestruar sasi të konsiderueshme lëndësh narkotike.
Materialet procedurale i janë referuar Prokurorisë për veprime të mëtejshme.
