Policia e Durrësit ka finalizuar operacionin e koduar “Cleaning 4”, i zhvilluar për goditjen e aktivitetit kriminal të shitjes së lëndëve narkotike në afërsi të shkollave në qytetin e Kavajës. Si rezultat i operacionit janë arrestuar 9 shtetas, ndërsa 3 të tjerë janë shpallur në kërkim.
Operacioni u realizua nga Seksioni për Hetimin e Narkotikëve, Forca e Posaçme “Shqiponja” dhe Forca Operacionale të DVP Durrës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Durrës. Hetimet kishin nisur prej disa muajsh dhe janë zhvilluar me metoda speciale, pas informacioneve të siguruara në rrugë operative.
Sipas Policisë, të arrestuarit, të moshave 20 deri në 48 vjeç dhe banues në Kavajë, dyshohet se vepronin në bashkëpunim me njëri-tjetrin për shpërndarjen e lëndëve narkotike pranë shkollave të qytetit.
Gjatë operacionit u sekuestruan sasi të lëndëve të dyshuara narkotike kokainë dhe cannabis sativa, të ndara në doza, si dhe disa telefona celularë që dyshohet se përdoreshin për aktivitetin kriminal.
Ndërkohë, Policia vijon punën për lokalizimin dhe kapjen e 3 personave të shpallur në kërkim. Materialet procedurale i janë referuar Prokurorisë së Durrësit për veprime të mëtejshme hetimore.
